Oktäbrinin 20-dä Moldova devletindä geçti Konstituţiya referendumu, angısının neeti — giriştirmää Konstituţiyaya iki eni punkt, angıları göstereceklär Moldova devletin kursunu belli edecek — kayıl mı Moldova yaşayannarı Evropa Birliinä girsinnär о sa diil kayil mı. Bu iş için kendi kayıllıını 50,38% insan açıkladı, 49,62%, insan kayıl olmadılar. Ondan sora, nicä haberlendi referendumun çıkışları, gagauziyanın yaşayannarı hem cümnä aktivistleri açiklȇȇrlar kendi bakışını Konstituţiya referendumun çıkışları için.
Oktäbrinin 22 — dä Comrat.md saytında Komrat muniţıpiyasının primarı Sergey Anastasov video aşırı avtonomiyanın yaşayannarına danıştı, açıklayıp kendi bakışını Konstituţiya referendumun çıkışları için. Avtonomiyanın baş kasabasının çorbacısı kritika Gagauziyanın yaşayannarına yaptı, angıları seçimnär günündä, oktäbrinin 20 – dä, seçtilär Evropa Birliinä girmemää.
«Eer sölärsäydik seçimnerin çıkışları için, elbetki, onnar biraz karşı giderlär bizim kasabamızın ilerlemesinä, karşı giderlär Gagauziyanın ilerlemesinä. Bölä çıkışlarlan Gagauziya, bezbelli, kaybeder bu etapta, laf gider referendum için»,- dedi primar.
Hep o gün, sade avşamnen, Komrat kasabasının muniţipal nasaatçısı İvan Panä esaba aldı Sergey Anastasovun video danışmasını. Nasaatçı çizgiledi, ani primar lääzım kasabanın problemalarını çözsün.
«Sergey İlyiç! Siz her zaman sölärdiniz bizä, ani siz hiç bir zaman politikacı olmayacenız. Siz kasabanın çorbacısı olaceynız. Bölä, dünkü danışmanızı, nicä politika adamı yaptınız. Ko primar kasabanın problemalarını çözsün, bu uurda çalışsın. Komentariyaları benim Facebuk-umda, primarda yazdı. Bana geler, ani bizim kasabamızda hepsi yapıldı Evropa grantların yardımınnan.Ne olȇr?Ne Gagauziyanın yaşayannarı hem Komrat kasabasının yaşayannarı, biz sizinnän, vergileri ödämedik mi?»,- söledi İvan Panä.
Komrat kasabasının yaşayannarı umutlanȇrlar, ani kasaba ileri dooru da teriplenecek hem ilerleyecek.
«Eеr insan onu ayırdısaydı, o lääzım insana işlesin.Siz sayȇrsınız, ani o işlämeer mi? O işleer, ama bizim sokakta, bän taa gençtim, artık ihtärladım, koyulmadı taa bir da taş. Biz da burada yaşȇȇrız, biz dä vergileri ödedik».
«Primar lääzım kasaba için çalışsın. Esaba alsın hepsini. Te bu maşınalar da hepsi burada, gaz — bu ilk, ikinci da koysunnar bu maşınaları, var te buradan aşaa meydan».
«Primar lääzım çalışsın, ki bizim kasabamızda oldun hepsi pak, gözäl, yollar da».
«Neylän mi? Hepsinnän, olsun insannan».
«Bän bilmeerim bişey, bän bölä işlärlän zanaatlanmȇȇrım. Bana kim dä olsun. Bana ne primar, ne bişey diil lääzım».
«Onu insan ayırdısaydı, o lääzım kasaba için, insan için çalışsın. Ko kasaba olsun nicä düşer».
Avtor: P. Barbova, operator: A. Glekov, montaj: A. Gerçu