60 yıl sevgi hem uşakları terbi etmäk. Kıpçak küüyün «Buratino» uşak başçası tamannadı 60 yaşını. Yortulu olay topladı birkaç evlad boylarını, üüredicileri, anaları-bobaları hem hepsini,kim baalıydı bu uşak başçasınnan.
Yaslanın 60-cı yıldönümümdä musaafirleri kaarşıladılar yortulu programaylan — türkülärlän hem oyunnarlan. Uşak başçası pek önemni kurum herbir yaşamak erindä, dedi Kıpçak küüyün primarı Oleg Garizan: «Adet kutlamaa yıldönümünü pek islää, açan biz var nicä nışannayalım diil sade şindiki üüredicileri, ama hepsini analım, kim işledi burada 60 yılın içindä».
Gagauziya başkanın komandasının adından uşak başçasının kollektivini kutladı Bakannık komiteti başı ilk yardımcısı İlya Uzun: «Sizin işiniz pek zor , siz terbi edersiniz uşakları, nesoy siz onnarı üüredersiniz, ölä dä onnar yaşamakta gideceklär. Yaşamakta çok işlär olêrlar, ama siz onnarı hazırlêêrsınız».
60 yılın içindä «Buratino» uşak başçası ikinci ev oldu çok uşaklar için, dedi Gagauziya üüretim bakannıın baş uzmanı Svetlana Podsuhina: «Pek sevinmeli herzaman bu yaslaya gelmää, o Gagauziyada en ii yaslaların birisi, 53 uşak başçası var bizdä, kollektiv dä burada gösterer kendisini, üüsek uurda, akıllı üüredicilär hem burada veriler çok dikkatlık gagauz dilin üürenmesinä».
Kendi kutlamaklarını söledi Halk topluşu deputatı Valeriy Manastırlı: «Bu uşak başçasından çıktı çok akıllı insannar, angıları bizim Kıpçak küüyünü hem yaslayı anılmış yapêrlar. İsteerim şükür demää hepsinä, siz büük işi yapêrsınız, nicä dä üüredicilär, ama uşaklar terbiedilerlär en ilkin».
Uşak başçası kollektivin başarları için söledi yaslanın başı İrina Kaykı. Adetçä herbir yortuda baaşışlar verilerlär. Hepsi musaafirlär baaşladılar yaslaya lääzımnı tertipleri.
Avtor: A. Karapirä, operator hem montaj: Leonid Arfanos
Moldovanın hem Gagauziyanın en mekalı haberleri GRTnın Telegram kanalında!