Mart ayın 3-dä Taraklı kasabasında nışannadılar Bulgariya Respublikasının serbestlik gününü.
Bulgar kahramanın Olimpiy Panovun anmak taşında geçti yortulu miting. Çiçek koyulmasında pay aldılar dolay kuvetleri, Taraklı yaşayannarı hem Bulgariya konsulu Lübomir Dimov. Hepsi onnar urguladılar, ani bu gün bulgar halkı için pek önemni.
«Bizim için bu en önemni yortu var nicä sölemää. Biz anȇêrız o kahramannarı, angıları güreştilär Bulgariyanın serbestlii için. Aklımıza getireriz hepsini, kim yaşamasını bu üzerä verdi. Benim için bu çok önemni gün».
«Bu pek önemni, ki uşaklar da bilsinnär bunu, korusunnar hem ileri dooru da unudulmasın bu büük günnär».
Taraklı dolayı başı Lazar Dermenji haberledi,ani bölä olaylar her yıl geçirilerlär. Genç evlad boyları da lääzım bilsinnär kendi halkın istoriyasını, urguladı Lazar Dermenji: «Bunnar bizim milli kahramannarımız, angıları yaşamalarını verdilär, ki bulgar halkı serbest olsun. Bizim için pek önemni korumaa bu istoriya sayfalarını. Buz savaşêrız gençlerä da vermää hepsi bu haberleri, göstermää, nekadar bunnar bizä önemni. Hepsi adetleri biz ilerlederiz hem koruyêrız,onuştan da geçireriz hepsi bu olayları».
Taraklıdan Olimpiy Panov güreşti kendi Ana Topraan serbestlii için, urguladılar olayın musaafirleri. Hep ölä dä bu büük günä adalı olay geçti Taraklı Grigoriy Ţambalük adına universitetindä dä. Studentlär gösterdilär muzika hen oyun nomerlerini. Her yıl Bulgariyada Mardın 3-dä kaldırêrlar bayrakları, ki anmaa o kahramannarı, kim verdi yaşamasını devletin serbestlii için.
Avtor: A. Karapirä, operator hem montaj: L. Arfonos
Moldovanın hem Gagauziyanın en mekalı haberleri GRTnın Telegram kanalında!