Bu yıl Kırlannı küüyü 100-cü yıldönümünü nışannayacȇk.Küü kurbanını yaşayannar iyülün 12-dä Pötr hem Pavel Ayoz günündä bakacȇklar.
Uzak 1924-cü yılda ilk yaşayannar kendi evlerini başladılar bu küüdä yapmaa.Şindiki zaman küüdä 1000 kişi yaşȇȇr. Domnika Duşkova kendi 93 yaşında çok işlär var nicä annatsın kendi küüyün istoriyası için.
«Fukaarä küüdü.Kongazdan yayan evä gelärdik. Adetçä pazarlarda, dinnenmäk günündä, anamızı hem bobamızı dolaşardık. Kolhozda işledik,vaarlıydık», — Kırlannı küüyün yaşayanı Domnika Duşkova annadȇr.
Domnika Georgievna çok uşaklı ayledä Kongazda 1931-ci yılda duudu. 8 kızı anası hem bobası sert terbiettilär,söleer yaşlı insan.
«Gidersiniz işä, büüklerä laf geeri çevirmesiniz, seslersiniz. Bir kimsey su istärsä, getirin. Kendi işinizi bitirdiniz yardım edin başkasına da»,- Kırlannı küüyün yaşayanı Domnika Duşkova akıla getirer.
Domnika küçüklüündän biler ne o aaçlık hem cenk,cünkü ozaman insan o vakıtları geçirärdi.
«Bobam o vakıtlar ruba getirärdi hem satardı. O paraya imelik hem pala satın alardı. Cenk yıllarını unutmaa yok nicä.Rumım armiyasından sora Baurçu küüyün tarafında cenk gidärdi. Moldova topraklarına ruslar geldi.Biz ozaman Kongazda dädunun maazasında saklanardık. Yanımıza su hem imää alardık,pek korkardık»,-nışannȇȇr Domnika Duşkova.
Domnika Duşkova rumın okulunda 5 klas bitirdi.Ondan sora 14 yaşındaykana barabar aylesinnän kırda başladı çalışmaa. Pazarlarda hem büük yortularda kendi dostlarınnan horuya çıkardı.
«Saat yoktu ozaman,ruba hem ayakkabı ta etişmäzdi.Çalgıcıları sade Paskelleyä çaarardık. Anamız hem bobamız sade gün kauşıncasına sokakta gezmää brakardılar. Utancak olmaa deyärdilär. Gelärdik evä erkencä,ertesi günä deyni talgayı,imää,su hazırlamaa»,- nışannȇȇr Domnika Duşkova.
1950-ci yılda Kongazda genç Domnika tanıştı Duşkov Kirillan.Teezdä dä gençlär evlendilär.Aylä kurmaa Kırlannıya geçtilär,angısını kurdu Kirilın dädusu Duşkov Kirill İvanoviç.Şindi küüdä binä yakın kişi yaşȇȇr.
«Açan kolhozu kurdular,karılar adamnarlan birtürlü işlärdilär.Çin saabalendän hepsi işä gidardi. Toprakları işlärdik,berekedi büüdärdik.Duudurdardık hem terbiedärdik uşaklarımızı. Zordu vakıtlar,ama uslulukta yaşadık,Allaha inannan»,-söleer Domnika.
2001-ci yılda Domnika Georgievna popaza tekliflän yaklaştı. Küüdä klisä yapsınnar.
«Boba Dmitriy kayıl oldu benimnän, hızlı da kliseyi yaptılar.Ayozlu Pötr hem Pavel adını taşıyȇȇr.Büün dä ayozlu kiyatları okuyȇȇrım, duva ederim hem şükür ederim Allaha,ani kısmetli eceli yaşȇȇrım», -sonuçladı Domnika Duşkova.
