Gagauz Eri Başkanı E.Guţul, Saalıı korumak bakannıın başı yardımcısı A.Kozar, Beşalma küüyü primarı Valeriy Moş bu yaşamak erin Aylä doktorları ofisindä bulundular. Onnar baktılar netürlü burada düzüntücülük işleri ilerleerlär.
Beşalma küüyü Aylä doktorları ofisindä derindän düzdürtmäk işleri geçirilerlär. Bu yapı geçän asirin 70-ci yıllarında kaldırıldı. Bu yılların içindä yapı kötü hala geldi. Da artık akreditaţiyayı vardı nasıl geçämesin. Da küü bolniţasız kalacȇydı. Bu noktaya etişmemää deyni erli kuvetlär avtonomiyanın öndericiliinä danıştılar. Bakannık komiteti hem dä Halk topluşu yardımcı oldular. 2 million 200 bin ley verildi.
«Dışarı tarafından yapıldı işlär. Şindi yapılȇr içindä, çünkü orada çok yıl yapılmadı remont. Bakannık komitetindän 2 milion ley verildi, ani insannar gelsinnär islää Saalık merkesinä saalıklarını doorutmaa»,- nışannadı başkan.
Hepsi işlär mart ayın bitkisinädän yapılsınnar lääzım, söledi küü başı V.Moş.
«Duvarlarda çatlaklar oldu. Dört yılda 1 keret bizim bolniţa akreditaţiyayı geçer. Bizä söledilär “bişey yapmarsanız, kurum kapanacȇk”. Bundan sora biz — primariya, nasaatçılar, deputatımız, Bakannık komitetinä danıştık yardım etsinnär bizä remont yapmaa»,- dedi primar.
Beşalma küüyü Aylä doktorları ofisindä iki doktor işleer. Bakmayarak, ani remont yapılȇr, paţientleri burada sırasıyca kalblederlär. Maasuz koşullar aptekada kuruldular, ani bu yapının ard tarafında bulunȇr.
«Gagauz Erindä 17 aylä doktorları medik kurumu var. Herbirindä dä nesoysa zorluklar var, çünkü bu yapılar taa Sovet birlii zamanında kaldırıldılar. Her yıl regional kuvetlär bu kurumnarda remont yapmak için para vererlär»,- annattı Kozar.
Regionun kuvetleri birliktä primariyalarlan saalık merkezlerin durumunu göz önündä tutȇrlar. Lääzım olarsa birliktä zorlukları çözerlär, çizgiledi Saalıı korumak bakannıın başı yardımcısı A.Kozar.
Moldovanın hem Gagauziyanın en mekalı haberleri GRTnın Telegram kanalında!