Gagauz Eri Başkanı E.Guţul, Üüretmäk bakanı Nataliya Kristeva, Gençlik hem sport bakanı Väçeslav Dragoy Beşalma küüyü M.Kösä adına gimnaziyasında iş vizitinnän bulundular. Onnar burada giriştirilän infrastruktura proektlerin kalitesini notaladılar.
Beşalma küüyü M.Kösä adına gimnaziyasında sport salonunda derindän düzrütmäk işleri yapıldılar. Para Gagauz erin bücetindän verildi. yakın 800 bin ley. Beşalma küüyü başı V.Moş çizgiledi, ani bu proekt hepsi yaşayannar için önemni.
«Primariya, nasaatçılar danıştık Bakannık komitetinä yardım için. Bu sport salonunda çoktan remont yapılmadı. İki yılın içindä burada iki önemni proekt giriştirildi»,- Beşalma küüyü başı V.Moş çizgiledi.
Bu proektä görä sadece üürenicilär için uygun koşullar kurulmadılar. Sport salonuna büük yaşayannar da geläbileceklär sportlan zanaatlanmak için. Bulundular bakannık komitetin azaları üüretmäk kabinetlerindä dä. Onnar burada olan koşullarlan tanıştılar. Resurs merkezinä dä girdilär. M.Kösä adına gimnaziyasında taa bir önemni proekt giriştiriler. Tezlä o başa çıkarılacȇk, nışannadı Gagauziya Başkanı Evgeniya Guţul: «Bu proekt pek önemni, çünkü verecek gimnaziyaya paralarını arttırmaa kolaylıı. Butakım onnar başka bişey alabileceklär».
Neetlenerlär burada taa birkaç proekt giriştirmää. Hep taa var olan zorluklar için söledi gimnaziyanın başı N.Albu: «Kompyuter klasımızı ilerletmää isteeriz. Kompüter etmeer bizä. Hem dä okulumuzun kapu önü yapılsın lääzım. Zamandaş koşulları üürenicilrimizä deyni kurmaa isteeriz».
Gimnaziyada üüretmäk proţesi uygun ilerleer. Üürenicilär Regional olimpiadasında başarılı oldular, haberledi Gagauz Eri Üüretmäk bakanı N.Kristeva: «Var taa zorluklar. Biz bunu bileriz. Birliktä hepsini yapacȇz. Bu okul ilerleer. Bu yıl Regional olimpiadasında var nicä söleyim, ani onnar çok ilk erleri aldılar türlü predmetlerdä: matematika, gagauz dili hem literaturası, istoriya. Saa olsunnar üüredicilär. Saa olsun administraţiya, ani işi uygun kurȇr».
Beşalma küüyü M.Kösä adına gimnaziyasında 260 üürenici üürener.
Moldovanın hem Gagauziyanın en mekalı haberleri GRTnın Telegram kanalında!