Moskvada okul sportu 11-ci halklaarası forumu geçer. Onda pay aldılar Baamsız Devletlerdän 450 spotrçudan zeedä. Gagauziyayı forumda temsil etti Kıpçak küüyü voleybol komandası. Onnar taradılar Uzbekistan, Kazahstan hem Pridnestrovie regionundan komandalarını. Gagauziya başkanı bu başarlarlan onnarı kutladı.
Gagauziya Başkanı Evgeniya Guţul nışannadı sport uurunda regionun başarlarını. O adadı voleybolculara üüsek başarları ileri dooru da çizgiledi, ani erli kuvetlär herzaman tutturaceklar sportun ilerlemesini Gagauziyada.
«Bän isteerim sölemää, ani bizim kızlar becerikli hem ii spotçular, angıları ii çıkışları gösterdilär. İsteerim şükür etmää Rusiya Devletin sport bakanınını verilmiş kolaylık için, açan bizim uşakların var şansları çıkmaa Moldovadan da göstermää kendi becermeklerini üüsek uurda»,- nışannadı başkan.
Komandanın treneri Üriy Baboglo notaladı sportçuların üüsek becermeklerini. O açıkladı kendi fikrini spotçuların becerileri için hem annatı, nicä geçtilär hazırlanmaklar yarışmalara hem plannarı için.
«Bekledik bu momenti, bu gitmeyi çoktan. Kızlar gösterdilär üüsek çıkışları. Belliydi, ani burada komandoların taa üüsek uurlarıydı, nekadar bizdä. Rusiya sayılȇr dünnedä voleybol liderlerin birisi , Belarusiya da. Ama bizim kızlarımız gösterdilär kendi uurlarını, neyä onnar üürendilär. İstärdik taa çok, ama var taa neyä üürenmää da gitmää ileri»,- dedi trener.
Onun için, nicä geçtilär yarışmalar, annattı voleybolcuların birisi. O nışannadı, nesoy neetlär durȇrlar spotçuların önündä.
«Biz pek sevineriz hem şükrederiz hazırlayıcıları hem hepsini, kim bizä yardım ettilär bulunmaa bu turnirdä. Biz umutlanȇrız, ani bu bizim diil bitki gitmemiz. Turnir geçti üüsek uurda. Komandolar kaaviydilär, ama biz dä kalmadık aşaa»,- çizgiledi sportçu.
Şkola sportu 11- ci halklararası forumuna girer altı sport disţiplinalar: masa tenisi, voleybol, mini — futbol, şahmata hem sport güreşmesi. Yarışmalardan karä forumun pay alannarına nasaat edildi kultur programası master- klaslarlan katılannarın adetleri için.
Avtor: P. Barbova, O. Lotka, operator: A. Glekov, montaj: A. Gerçu