Yakın 300 bin ley verildi avtonomiya bücetindän Kirsovo küüyün saalık merkezin lääzımnıklarına. Bu paralara medik kurumunda düzüldülär odalar medik gübürlerin tutması için. Geçirilmiş işleri kontrol etti Gagauziya başkanı Evgeniya Guţul.
Gagauziyada Saalık merkezlerin ii çalışması için her yıl avtonomiya bücetindän veriler para onnarın lääzımnıklarına. Bölä medik kurumnarın birisi o Kirsovo küüyün saalık merkezi. Medik kurumuna lääzımdı oda medik gübürlerin tutması için ki geçmää avtorizaţiyayi da cuvap etmää lääızmnı koşullara haberleri Kirsovo küüyün saalık merkezin başı Elena Dudoglo. O nışannadı, ani medik kurumu kimi zamanda akreditaţiyayi hem avtorizaţiyai geçer. Kriteriyaların birisi medik gübürlerin tutması için içer olsun lääzım.
«2024-cü yılda verildi 298 bin ley subsidiya gibi. Biz onnarı harcadık. Düzdük garajı, iki depozit odayı hem yaptık kabinetı medik gübürlerin tutması için. Ne pek önemni büünkü gün. Nicä saalık merkezi biz bu kabinetsiz yok nasıl işelyelim. Kirsovo küüyün saalık merkezindä izmeti kableder edi bin yaşayan. O uşaklar da büüklär da, angılar aşları kablederlär, staţionarda ilaçlamayi geçerlär. Da medik gübürleri bitki kararlara görä lääzım dooru yok etmää. Bunun için biz sevineriz ani kablettik bu paraları da yaptık hepsini da şindi var nasıl işleyelim nicä 21-ci asirdä»,- nışannadı saalık merkezin başı Elena Dudoglo.
Kirsovo küüyün saalık merkezindä medik gübürlerin tutması için depozitlerin düzülmesinä verildi yakın 300 bin ley haberledi Gagauziya başkanı Evgeniya Guţul. O nışanandı, ani bölä sayı lääızmdı işlerin geçirilmesi için.
«Onnar yaptılar skladları, neredä lääzım tutsunnar, korusunnar medik preparatları hem medik gübürlüü, angılarına lääızm ayırı er, ani onnar fıydırılmeer başka gübürlärlän. Onnara lääızm tam er. Orada hepsi koşullar lääızm olsun»,- nışannadı başkan.
Başkan nışannadı, ani vizitin süresindä üürendilär ne taa lääızm merkezä da bu uurda kuvetlär işleyeceklär urguladı regionun başı.
«Ondan biz yavaş-yavaş işleyecez da yapacez herbir küüyüdä, neredä bizim insannar ilaçlanerlar, alsınanr islää ilaçlanmayı, bizim mediklär da, onnara da islää erdä bizim insanı ilaçlasınnar. Biz herbir küüyüdä herbir saalık merkezindä birbişey yaperız»,- nışannadı Evgeniya Guţul.
Kirsovo küüyün saalık merkezi işleer 1974-cü yıldan ama erleşili o eski okulun yapısında. Belli oldu ani yapı küçük da saalık merkezi kendi bütün kuvedinä işleyameer. Bunun için lääızm taa büük kurum, söledi Kirsovo küüyün saalık merkezin başı Elena Dudoglo. Saalık merkezin yanında toplandılar yaşayannar, angıları danıştılar Başkana kendi problemalarınnan hem küüyün problemalarınnan.
«Açan bizim yanımızda insan var, biz ta duyerız kendimizi kuvetli, politika politikaylan, ama büük kuvet o insananrda. Da insan görer bizim işimizi. İnsan biler nasıl zor işleeriz, ama bizdä oler»,- dedi başkan.
Moldovanın hem Gagauziyanın en mekalı haberleri GRTnın Telegram kanalında!