Gagauziya Başkanı Evgeniya Guţul iş vizitinnän Beşgözä geldi. O küüyün gimnaziyasında uşak başçasında hem klisesindä bulundu. Tanıştı bu soţial kurumnarında olan koşullarlan. Hep ölä avtonomiyanın başı Beşgözün öndericisinnän burada giriştirilän proektlär için lafetti hem zorluklar için sordu.
Beşgöz küüyün problemaları, nicä dä başka küüylerin problemaları, birtürlü.Ama taa aktual onnar büük yaamurlardan sora olȇrlar. Erli kuvetlär bu problemaların çözülmesininnän işleerlär. Bitki sıra yardım için onnar regional kuvetlerinä danıştılar.
«Büünkü topluşta biz açtık problemaları, angıları var bizim küümüzdä. Büük problemaların birisi, ani bir ay öncä yaadı büük yaamur, bozdu pek yolları, biz primariyaylan savaştık yapmaa ne var küümüzdä, danıştık başkana da onun için bizdä var yardımcı. Çekedincäk yaamaa kar, biz doorudalım yolları, çözelim bu problemayı bitkiyadan»,- söledi Beşgöz küüyün nasaatın başı Mihail Moşat.
Regional kuvetleri Gagauziya herbir yaşamak punktunda cümnä uurunu kaldırması için elindän geleni yapaceklar, nışannadı Gagauziya Başkanı Evgeniya Guţul. Başkan hem HT başı Beşgöz küüyü yaşayannarınnan hem öndercilerininnän buluştular. Beşgöz küçüräk bir küü, ama burada ii ürekli insannar yaşȇȇrlar, nışannadı Çadır Dolay administraţiyasının başı Natalya Şoşeva.
«Kuvetlär biri-birinnän işleerlär, küüydä birlik var. Biz gördük, nesoy açıklayabildik bilä büük yaamur hem lüzgärlän getirilän problemaları»,- nışannadı dolayın başı Natalya Şoşeva .
«Bizä şebönka lääzım almaa hem peydalanmış çukurları gömmää. Bunnarı kendi kuvedimizlän hem ellerimizlän yapȇrız. Yok ne eskovatorumuz, ne dä başka tehnikamız»,- annattı küüyün primarı Födor Todorov .
Problemalar büük hem onnarı kısa zamanda açıklamaa lääzım, açıklȇȇrlar erli kuvetlär. Uşak başçasında başkan tanıştı koşullarlan, angılarında 120 uşak terbiediler, nışannayıp, ani küüyün en küçük yaşayannarına deyni ii koşullar pek önemni.
«Sanitar odalarında sıcak suyumuz yok. İi olaceydı, eer binada remont yapılsaydı, sanitar odalarımız ama ii halda bulunȇrlar, onnarı zamandaş tehnologiyalara görä birkaç yıl geeri yaptık»,- nışannadı Beşgöz küüyün uşak başçasının başı Nadejda Stoyanova.
Gimnaziyada didaktika kadrolarınnan buluşmak geçti. Burada açıklandılar zamandaş istediklär. Ayırı erdä üürenmäk kalitesi açıklandı. Burada Başkan yısıtmak sistemasını diiştirmäk proektin gerçeklenmesininnän tanıştı . Zamandaş yısıtmak sisteması verecek kolaylık bücet paralarını korutmaa hem odaları yısıtmaa.
«Mutluyuz , ani Başkan büün geldi bizim okulumuza. Biz var ne gösterelim, ama var problemamız da. Onnarı lääzım barabar çözelim uşaklar için. Büün okulda sıcak, ama bizim problemalarımız durȇrlar erindä»,- çizgiledi Beşgöz küüyü gimnaziyasının başı Tatyana Kalın.
Vizitin süresindä Başkan küüyün klisesindä dä bulundu. Burada düzüntücülük işleri giderlär. Beşgöz küüyün klisesi 1999-cu yılda düzüldü hem Gagauziya eni kliselerin biri.
«Biraz oyaca şpaklövka yapılȇr, duvarları da resimneeriz. Binanın içända bitirdiynän, dışarda işleri başlayacez»,- nışannadı Protoierey Pötr .
Bitki obyekt, angısında bulundu Gagauziya Başkanı-o cümnä yardımı merkezi oldu. Büün burası sade proekt, am neetlenerlär burada zor durumda bulunan pensionerleri kabletmää.
«Bu pek lääzımnı bir iş. Pek çok insan yalnız yaşȇȇr. Kışın onnara pek zor. Büünkü gündä dokumentleri hazırlȇȇrız, finans aarȇrız»,- nışannadı Beşgöz küüyün cümnä merkezin işini götürän Natalya Kambur.
Bölä büük vizitleri Gagauziya Başkanı herbir küüydä gerçeklemää neetlener. Bu verecek kolaylık belli etmää problemaları, angıları yaşayannarı dalgalandırȇrlar.
«Biz geldik, buluştuk insannarlan, primarlan, küü nasaatınnan, şkolanın öndercilerinnän, uşak başçasının müdürünnän. Annattık, ne var hem işittik, angı problemalar var, angı acılar var insannarın cannarında. Hepsi problemaları isteeriz çözmää. Zor mı vakıtlar, ama biz herzaman işleeriz»,- çizgiledi bölgenin başı Evgeniya Guţul.
Var olan problemaları belli etmäk hem onnarı çözmäk için yaşayannarın hem kuvetlerin arasında bölä dialog kurulsun lääzım, açıkladı Gagauziya Başkanı Evgeniya Guţul.
