Gagauz Eri Başkanı E.Guţul, Kultura bakanı M.Semönova iş vizitinnän Beşalma küüyü Milli Gagauz etnografiya muzeyindä bulundular. Burada onnar muzey işçilerinnän buluştular, eksponatlar için eni bilgileri üürendilär hem dä var olan problemalar için lafettilär.
Beşalma küüyü Milli Gagauz etnografiya muzeyi 1966-cıda kuruldu. Kurdu onu anılmış gagauz resimcisi, skulptoru, yazıcısı, peetçisi D.Kara Çoban. Onun baş neeti — gagauzların istoriyasını, kulturasını evlad boyları için korumaa. Büünkü gündä bu işi ilerleder D.Kara Çobanın kızı Lüdmila Marin-Kara Çoban. Muzey çalışannarı musaafirlerä burada var olan ȇksponatlar için annattılar.
Muzeydä 21 bin ȇksponattan zeedä var. Hepsi onnar gaguzların istoriyasını annadȇrlar. Ev zanaatlarını gösteterlär.
«İkinci keret gelerim bu mizeyä, nicä başkan oldum. Sansın ozaman hepsini gördüm, ama bu sıra genä nesä eni gördüm. Küçüklüüm aklıma geldi. İsteerim sölemää, ani bu en gözäl muzey bizim avtonomiyamızda. İnanȇrım, ani nekadar da gelmesäm, herkeret nesä eni bulacam»,- nışannadı başkan.
Beşalma küüyü muzeyi başı Lüdmila Marin-Kara Çoban söledi, ani bu kuruma kuvetlerin yardımı lääzım.
«Вana geler biz açıklayabildik bizim problemalarımızı. Onnar becererlär görmää o problemaları. Onnar becererlär o problemaları sökmää. Bizim yapımız yufkalandı. Duvarlar silkiner. Yapıyı lääzım kaaviletmää. Taa bir problema — biz yok neredä koruyalım bizim fondlarımızı»,- Lüdmila Marin-Kara Çoban söledi.
Muzey çalışannarı paalı ȇksponatları korumaktan kaarä, gagauz halkı folklörunu hem adetlerini koruyȇrlar. Onnar musaafirleri özel halk türkülerinnän tanıştırȇrlar. Butakım kultura ilerleer, kol boylarından evlad boylarına geçer.
Moldovanın hem Gagauziyanın en mekalı haberleri GRTnın Telegram kanalında!