Hayvancılık Gagauziyada önemni rolü ekonomika ilerlemesindä oynȇȇr. Agrariyaların bir kaçı sayȇr, ani bu bölüm bir sıra zorluklarlan karşı geler, angıları baalı ekonomika koşullarınnan, klimat diişmeklerinnän hem migraţiya olaylarınnan. Regionda hayvancılık bçlümünda birkaç çeşit hayvan büüderlär- inek, kouyun, keçi hem kuş.
Tomay küüyün Mihail Gargalık aylesindä –sevgi hayvannara önemni eri kapladı. Onnar örnek insannara, kim hayvancılıklan zanaatlanȇr, bakmayarak hepsi zorluklara, angılarınnan karşı gelerlär, çalışmaları hep okadar başarlı.
«Hayvancılık diil okadar gelirli iş.Bu urda çalışȇr onnar, kim pek sever hayvannarı»,- dedi hayvancı.
Çiftçilik çorbacılıında şindi 500 keçı var. Ama çeketti Gargalık aylesi hayvancılıklan zanatlanmaa bir kaç kafadan.
«Açtık çiftçilik çorbacılıını. Hayvannarı saıya koyduk, herbirin paspordu var. Çalışmalarımızı «Hayvancılık için» kanona görä ilerlederiz »,- sayȇr Mihail Gargalık.
Fermerlerin işi diil kolay. Dayma türlü zorluklarlan karşı gelerlär.Çok izmet var bakarkan hayvannarı.Komrat kasabasının yaşayanı Dmitriy Manol giriştirer proektı ,angısının yardımınan onun olacȇk kolayı keçi hem koyun südünü, ü türlü maasul mallarını yapmaa.
«Hayvannarı küçüktän beenerim.Bu canımda bezbelli. Bu diil biznes, burada kazanmaa yok nicä. Açan hepsi diişecek, ozaman kazanmaa var nicä, ama bu olacek ozaman, açan Evropa birliinä girecez, açan bizdä olaceklar hep ölä subsidiyalar hem hayvancıları saysınnar lääzım»,- nışannȇȇr Dmitriy Manol.
İş ellerin etişmemezlii, kuraklı havalar, diil uygun paalar. Bu baş problemalar, angılarınnan karşı gelerlär Gagauziyanın hayvancıları, urguladı Avtonomiyanın çiftçilik bakannın uzmanı İvan Draganov.Bitki yıllar Moldova hem Gagauziya kuvetleri türlü subsidiya hem başka çiftçilik uurunda yardımnamak programaları gerçekleştirerlär, angıları doorudulu hayvancılık sektorun modernizaţiyasına.
«Subsidiyaları vererlär tertiplerä, hayvannarın satın almasına, laf gider lüţerna tohumnari için, da hep ölä var nicä türlü otları ekmää»,- çiftçilik bakannıın uzmanı İvan Draganov söledi.
Bakmayarak hepsi problemalara, Gagauziyada hayvancılık sektoru bitki 2-3 yılın içindä zeedelener. İvan Draganovun laflarına görä büün avtonomiyada yakın 9,5 bin inek var hem 130 bindän zeedä koyun hem keçi.
