Bakannık komiteti kendi sıradakı oturuşunda, angısı oktäbrinin 24-dä geçti, bir sıra soruş bakdı, angıları baalı paraların pay edilmesinnän üüretmäk bölümünä.
Bakannık komitetin oturuşunda bakıldı kanon proekti diişmeklerin giriştirmesi için 2024-cü yılın bücetinä, haberledi finans bakannıın başı Tatyana Doyçeva.
«Temsil edilmiş proekttä birkaç önemni moment var. Birisi onnardan, devlettän veriler 5 million 577 bin 500 ley. Bu paralar okullara verileceklär, da biz onnarı kabledelim lääzım. İkinci moment, biz geçirdik buluşmaları bakannıklalran hem dolay administraţiyalarlan kazanç paraların ödemesinnän baalı soruşta. Bu proekttä ikinci bölüm bu soruşlan baalı. Üçüncü bölüm, toplanılan gelirlär, angılarını okullar kablederlär izmetlerin temsil edilmesi için paraylan. Onnar da bücetä girerlär. Hem bitki bölüm, GHT bitki oturuşunda kabledildilär diişmeklär baş investiţiyalar programasına. Regional hem erli proektlerä görä para verildi kontribuţiya geeri çevirmäk fondundan»,- annattı Doyçeva.
Sora bu proekt doorudulacek GHT bakılmasına. Kanon organın başın yardımcısı Nikolay Ormanji danıştı finans bakannıın başına soruşlan eterli mi para bücettä ki üüretmäk kurumnar çalışsınnar. Gagauziya bakannık komiteti danıştı finans ministerliinä, ki respublikanın bücetindän verilsin 38 million ley. Bu sayı, angısı etişmeer avtonomiyanın okullarına. Bu yıl birinci kursun 9 studenti kabledecek Stepan Topal adına grantları bu üüretmäk yılın ilk altı ay için.
«3 student medik universitetin rezidentura ţiklasından. Bunun için laf gitti. Biz diişmekleri yaptık şindiki annaşmaya, da onnarı kurȇrız diil birinci kursun studentlerinnän leţenziat ţiklasından, ama onnarlan, kim kendinä zanaatı ayırdı. Biz annȇȇrız, nesoy doktorlar geleceklär bizä 2-3 yıldan sora, onnarlan annaşmakları kurȇrız. Bölä 3 student var, 3 kişi Tehnik universitetindä üürener zanaatlarda, angıları avtonomiyaya lääzım. 18 student Teatru, muzika hem incä zanaat akademiysında hem iki student matematika üüredicisi KDU»,- söledi üüretmäk bakanı.
Bütündän 9 studentä ödenecek 80 bin ley. Ama grantların bütündän sayısı studentlär için, angıları universitetlerdä üürenerlär , kurȇr bir million 7 bin ley.
«Var annaşmaklar studentlärlän, angıları üürenerlär. 2021-ci yıldan programa işleer. 93 student var. Hepsi onnar söledilär, ani üürenerlär. Bu koşulların birisi. Onnara lääzım 926 bin 662 ley verilsin. Bizdä 29 student medik universitetindä üürener, 41 tehnik universitetindä, 2 kişi teatru muzika hem incäzanaat akademiyasında, 6 student İ.Krängȇ adına universitetindä, var studentlär KDU hem Çakir adına kolecında. Bunnar , kiminnän annaşmaklar var»,- ekledi bakan.
73 student şansora üürenmeyi grant programasına görä başardılar, ama sade 21 iş buldu kendisinä. Nikolay Ormanji sordu, var mı ölä studentlär, angıları kullandılar grant programasını, ama evä gelmedilär işlemää Gagauziyada. Natalya Kristeva urguladı, ani bölä olaylar var.
«18 kişi iş bulmadı. Biz onnara iş erini verämedik. Bunun için soruş biri- birimizä yok. 21 başaran grantları geeri çevirdi. Bu annaşmaklan bakılȇr. Eer student işä avtonomiyaya gelmärsäydi, ozaman parayı geeri çevirer, angısını üürenmäk için kabletti. O 21 kişi. Var 4 borçlu da, angılarınnan işleeriz. Da er belli edilän vakıtta vermeyeceklär grantları geeri, dava yardımınnan bunu yapacez»,-nışannadı Kristeva.
Grant programası studentlär için avtonomiyada işleer 2021-ci yıldan.