Çadır kasabasında Ayoz Afanasiy adına klisesini düzerlär. Kimin yardımınnan bu iş yapılȇr, üürendi bizim korespondentımız Anna Karapirä.
Klisenin enidän düzülmesi başladı 2021-ci yılında da șindi taa ilerleer. Bu yapılȇr o insannarın yardımınnan, kim candan yakın bakȇr bu işä. Ișçilerin birisi, Stepan Dülger, haberledi, ani var taa çok, ne yapılsın, ama azar-azar olȇr. O nışannadı, ani kupolu adamnar kendi ellerinnän yaptılar.
«Biz yukarda yapȇrız karnizleri. Onnardan sora geçtik içinä, mayakları koyduk, țementleriz onnarı, islää gözäl olsun. Sora aşaa dooru skeleleri indirmää dä mayakları koymaa, da otää dooru țementlemää.Kupolu da adamnar başardıynan, koymaa üstünä»,- Stepan Dülger haberledi.
Barabar çalışmaklara görä kupol hazır oldu. Önemni hem dikkatlı moment – onu koydular klisenin üstünä. Nicä nışannadı boba Dmitriy, kupolu da, yapıyı da düzdülär hepsi kanonnara görä.
Boba Dmitriy nışannadı: «Bu klisä önemni, bu klisä tarihlän baalı, Çadırın tarihi, onun için çok sölener arhivlarda. Ama en paalı, ani burada çalışardı Mihail Çakirın bobası. Bu büük er,Mihail Çakirin duuma eri».
Çakir adına birliin başı Georgiy Ormanji nışannadı, ani ilerdä var taa çok iş, ama herbir yardım, angısını insannar vererlär, yaklaştırȇr bu käämil işi sonuca.
«Bizim klisä gözäl, çok ii. Nezaman sa o vardı, nekadar vakıt geçti. 44-cü yılda daattılar, şindii 2024 yılda durȇr kupol, Allahın kuvedinnän, insanın yardımınnan bizdä olacek hepsi islää»,- Ormanji nışannadı.
Çadırda yaşayannarın bakışına görä, klisenin düzülmesi sadece iilikleri getirecek insannara.
«Ne baalı kliseylän, herzaman islää. Görersiniz mi, angı vakıtta yaşȇȇrız. Lääzım sade kliseya gitmää, dua etmää, umut sade Allahta».
«Benim bakışıma görä, bu pek önemni, ayırı gençlär için. Bän kendim Dmitriy Çakirin hısımnarından, benim bobamın tarafından. Pek islää, ani insannar unutmȇȇrlar, da ilerlederlär onun işini».
«Pek önemni, neçin ki insannar yınanȇrlar Kurtarıcıya. Kliselerä girin, onnar dolu her Pazar. Çok pek gençlär var,uşaklar.İhtärlar her gün giderlär. Bu pek lääzım».
Klisä izmetçileri urgulȇȇrlar, ani Çadırda Ayoz Afanasiy adına klisä diil sadece arhitektura ptoekti, ama nışan, ki inan hem adetlär kaybelmesinär.
Avtor: A. Karapirä, operator hem montaj: L. Arfanos