Dokuzuncu klası başardıktan sora, angı zanaatı seçmää? Bu soruşa cuvabı üürenicilär M.Çakir adına kolacindä aaradılar. Bu üüretim kurumunda Zanaatlar festivali geçti. Üüredicilär hem kurumun studentleri annattılar netürlü koşullar kolecdä var hem nesoy zanaatları burada kabletmää var nicä.
9-cu klasların üürenicileri için meraklı programa kuruldu. Onnar M.Çakir adına kolecinnän tanıştılar. Çünkü tezlää bu üürenicilär ȇkzamanneri vereceklär. Bir payı liţeydä üürenmelerini ilerledecek, öbür payına sa zanaat seçmää lääzım olacȇk. Bu seçim taa kolay yapılsın deyni Zanaatlar festivali geçirildi. Musaafirleri M.Çakir adına kolecin başı M.Tanasoviç karşıladı.
Mariya Tanasoviç M.Çakir adına kolecin başı: «Bizim kolektivimizdä becerikli üüredicilär var. Onnarın sayısında pedagogika bilgileri doktorlar, 1-ci, 2-ci kategoriyaları olan üüredicilär. Onnarın arasında bizim başarannarımız da var. Onnar kendi professionallık uurlarını her yıl üüselderlär».
Başlankı klaslar üüredicisi, terbiedici, muzika uurunda terbiedici, soţial izmetçisi, turizma uurunda uzman — bu hem taa birkaç zanaatı M.Çakir adına kolecindä kabletmää var nicä. Zanaatlarlan hem koşullarlan 9-cu klasların üürenicilerini taa yakından kendileri studentlär tanıştırdılar. Bundan kaarä onnar kendi becermeklerini dä gösterdilär.
«Kolcdä üürenärkana biz hepsi lääzımnı bilgileri kablederiz. Kendimizi deneeriz. Koledj bizim açılmamız için hem ilerlememiz için hepsi koşulları kurȇr. Biz türlü olaylarda pay alȇrız».
«Bizim üüredicilerimiz — bizim dostlarımız».
«M.Çakir adına koleci — benim ikinci evim».
F.Angeli adına gimnaziyasının üürenicisi O.Hergeledji artık kararladı, ani 9-cu klası başardıynan bu kolacä üürenmää girecek. O turizma zanaatını seçti.
Olga Gergeledji F.Angeli adına gimnaziyası üürenicisi: «Bän turizmaytlan pek meraklanȇrım. Bu uurda uzman olmaa isteerim».
Zanaatlar festivalindä sade studentlär diil, amma 9-cu klasların üürenicileri dä kendi becermeklerini gösterdilär. Onnar incä zanaat konkursunda pay aldılar. Konkursu M.Çakir adına koleci hem Gagauz Eri Üüretim bakannıı birliktä kurdular hem geçirdilär. Tarayannar ödüllendilär.