Beşalma küüyün yaşayanı Anna Sırbu GRT CK yalvarımnan, nicä ȇko-vauçeri eski ev tehnikasını diiştirmük için danıştı. Pensiyada bulunan insan söleer, ani kendibaşına o bu işi yapamaycek. Kimä lääzım yaşlı insannar danışsınnar, ki vauçerı kabletmää, süjetimizdä açıklȇȇrız.
Beşalma küüyün yaşayanı Anna Sırbu yalnız yaşȇȇr. O söleer, ani ne baalı ȇko-vauçerlan bildirimi vermää, nesoy dokumentleri hazırlamaa, ki eski tehnika erinä eni almaa hem nereyä danışmaa bilmeer. Karı yardıma umutlanȇr, angısı verecek kolaylıı taa ȇkonomlu tehnikayı edinmää. Pensionerin laflarına görä, eski buz dolabı çok ȇlektroȇnergiya alȇr, e büünkü gündä pek duyulȇr.
«Bän bilmäärdim neredän yollanmaa da vauçerı almaa. Moldova 1 hem GRT yayınından işittim vauçer için, ama ne lääzım yapmaa, ki onu yolandırmaa hem nicä bu işi yapılȇr, bilmeerim. Onun için da sizä danışȇrım»,- Anna Sırbu söleer.
Аnna Petrovna Beşalma küüyünä Moldovanın poyraz tarafında yabancı dillerä fakultetini intitutta bitirdiktän sora gelmiş. Erindeki küüdä angliz dili üüredicisi 30 yıldan zeedä işlemiş. Pensiyada 14 yıl şansora.
«Buz dolabım ii halda diil.o 20 yıldan zeedä işleer. Bän onu eni buz dolabına isteerim diiştirmää. Baı problema – buz dolabı»,- Anna Sırbu söleer.
Pensionerkanın laflarına görä, buz dolabından akȇr hem o malları prost suuldȇr. Bu beterä imekleri hepbir sıra geler gözletmää. İçindä dä sade lääzımnı mallar.
«Yımırta, saa yaayı, ekmek, limon, balık var, yaanı yok»,- Anna Sırbu söleer.
Kompensaţiyaları suuk zamanda vermäk programası geçän yılın noyabrinin 3-dä çeketti işlemää compensatii.gov.md. Yardımı dokumentlerä erindeki soţial asistentleri doldurȇrlar. Gagauziya saalık hem soţial bakannıın başın yardımcısı Alöna Kozar söleer, ani ȇko-vauçerları kabledennerin taa çoyu-çok uşaklı aylelär. Yardımı hep ölä kabletti pensionerlär, angıların aylelerindä özel kolaylıklı insannar yaşȇȇrlar.
«Yardım paayın sayısı aylä durumnarından çekilärdi. Sistema kendisi seçer insannarı, kimä vauçerı düşer vermää. Ȇko vauçer – o vauçer, angısı ayleyä veriler. O bir sıra veriler. Devlet tarafından eski tehnikayı eniyä diiştirmää deyni maasuz sayı veriler. Benifiţiar 70%-lik para sayısını kullanabilir, angısı ona sorumnu»,- Alöna Kozar söleer.
Büün yaşayannar erindeki soţial asistentlerinä var nicä danışsınnar, angılarına dokumentlerini kompensaţiyayı suuk zaman için verdilär, söleer kurumun temsilcisi.
«Asistent sistemada var nicä baksın da sölesin aylenin var mı hakı kabletmää ȇko vauçerı, osa yok mu. Yada kimin haberi internettän var, sistemaya giräbilir, da kabletsin haberi düşer mı ona, osa düşmeer mi tehnikaya kabletmää»,- Alöna Kozar söleer.
Ȇko vauçerları yılın suuk zamanı için kim kabletti Аlöna Kozar açıkladı: «Var olan haberlerdän var nicä söleyim, ani 80 proţendädän vauçerları kabledennär – çok uşaklı aylelerä hem pensionerlärlän ayleleär, neredä var özel kolaylıklı kişi».
Avtonomiya yaşayannarın aklılarına getirderlär, ani kim taa kabletmedi kompensaţiya paraları suuk zaman için, bunu iyünün 30-dan yapabilirlär. Alınmadıı paralar devlet büdjetinä döneceklär.