Komrat kasabasının Kemal Atatürk adına   bibliotekasında Çadır — Lunga kasabasının yaşayanı Natalya Vornikova personal sergisini geçirdi. Sergidä koyulu 10 — dan zedä türlü janralarda resimnär.

Serginin açılışında incä zanaat sevennerindä  oldu kolaylık tanışmaa resimcinin Vornikova Natalyanın 13 resimnerinnän. İlk kendi resimini  Natalya yazdı 2007 — ci yılda. Bu diil autorun ilk sergisi, onun yaratamalarınnan taa ileri da diil bir sıra tanıştılar avtonomiyanın yaşayannarı hem da musaafirleri.

«Bän kablettim teklifi  bibliotekanın öndercisindän Vasilisa Serafimovnadan, da büük havezlän kablettim kararı, neçinki kendi yaratmalarını göstermää cümneya herzaman islä diil bir sıra yılda, ama birkaç sıra.Tematika hertürlü, burada işlär, angıları baalı karıların süretlerin açılmasınnan, annaşmaklar insannarın aralarında, neredä sä  nesoysa filosofiya  var burada»,-  nışannadı resimci.  

«GAGAUZ – ART» yaratma toplumun öndercisi Pötr Fazlı nışanandı, ani Natalya  Vornikova pek aktiv resimci, hem da, ani onun işleri ayırılȇrlar kendi stilinnän başka resimnerdän. 

«Onun işlerindän var nasıl tanımaa, kimin bu resimneri, ani maasuz Vornikova Natalyanın. O şindän sora kurdu kendi stilin  — millet stilini, gagauz stilini. Da bän sayȇrım, ani onun resimneri  hem da bizim yaratma  toplumun  temsilcilerin işleri   zamandaşta  dolduraceklar Gagauziyanın sergilerini eni yaratmalarınnan»,- Pötr Fazlı nışanandı.

Komrat kasabasının Kemal Atatürk adına   bibliotekasının başı Vasilisa Tanasoglo  çizgiledi, ani bu ikinci resimcinin sergisi, angısı geçer bu bibliotekada. İlk avtorun sergisi geçti 2022 — ci yılda.  

«Eer biz yaraştırarsaydık işleri, angıları koyuludular ilk sergidä hem da büünkü resimneri, elbetki, biz göreriz, nekadar büüdü resimcinin professional hem tehnik kolaylıkları. Onnar okadar türlü — türlü, onnar okadar meraklı, onnar okadar açık. Onnar bu kış günnerindä kaldırȇrlar bizim kefimizi»,- Vasilisa Tanasoglo  çizgiledi.

«Eer biz yaraştırarsaydık işleri, angıları koyuldular ilk sergidä hem da büünkü resimneri, elbetki var diişmeklär. Büünkü sergidä var nasıl görmää, ani may herbir resimdä, bän esapaldım, ani  kahramannarın pek küsülü suratları, may herbirindä maska. Bu pek çok işlär için söleer».

«Resimci kullanȇr birkaç   stil. Biz göreriz modernist stilini, 19 asirin bitkisi, biz göreriz zamandaş stili, biz göreriz orta asirleri. Pek sevindirer, ani kullanılmış millet incä zanaatı. Örnek gibi göreriz kızı, angısı oturȇr küçük gagauz skemnesindä, pençerenin yanında, kendi kilimin  yanında».

Natalya Vornikova  sayılȇr 40 resimnerin avtoru. Onun personal sergisini  Komrat kasabasının Kemal Atatürk adına   bibliotekasında var nasıl siretmää 1,5 ayın süresindä.