Komrat koledjında geçti Donor günü. 60 kişidän zeedä — studentlär hem üüredicilär kablettilär karar  vermää kan, ki yardım etmää  te onnara, kimä o lääzım. Akţiya geçiriler koledjda iki keret yılda.  Hazırlayanların  laflarına görä ,  her yıl  kan vermää isteennerin sayısı  zeedelener. 

Studentlär taa sabaalendän  bekläȇrdilär  kabinetın yanında, ki  vermää kan. Koledjda  geçer Donor günü.  Donor kanı  hergün lääzımnı  operaţiyalara,  yaralanmalarda hem  kötü hastalıklarda.  Bölä akţiyalar yardım ederlär zeedeletmää kanın rezervasını hem kurtarmaa insannarın  yaşamalarını, urguladı  vraç-transfuziolog Valeriy Gırneţ: «Bölä  olayları pek faydalı geçirmää , zerä var çok insan, paţient, angılarına lääzım kan, plazma. Er bir donor verer kanını, var nicä kurtarmaa üç insanın yaşamasını. Onun için pek önemni , maasuz açan bizdä  demografiya  gider aşaa, da donor kalȇr az. Bizdä var rezerv, ama biz savaşȇrız her keret  kalmamaa kansız». 

Proţeduranın önündä  hepsi payalannar  geçtilär medik kontrolünü. Doktorlar nışannȇȇrlar, ani kan vermää sade saalıklı insannarı  kolvererlär. 

«Donor var nicä olsun  herbir insan , Moldova devletin yaşayanı  18 yaşından 65 yaşınadan, ama saalıklı, 50 kiladan aşaa olmasınnar  hem birbuçuk metra balabannıı. Ama en önemni olmasınnar hasta»,-  varç nışannadı.

Kalmadı bir tarafta  koledjın medik uzmannarı da, angıları aktiv tutturdular  iniţiativayı da savaşȇrlar bulmaa motivaţıya, ki studentlär pay alsınnar bu akţiyada. Bu diil sade  yardım insannara , ama  soţial cuvaplıın kurulması üürenicilerdä, nışannadı  medik yardımcısı Anna Bejenar: « Biz geçirdik  konuşmaları uşaklarlan, ne o vermää kan, bu büük missiya, ki  kurtarmaa kiminsä yaşamasını. Kimä maasuz o lääzım. Çok keret olȇr ölä olaylar, açan lääzım insanı kurtarmaa zor durumda , maasuz kanın yardımınnan, onun komponentlerinnän.  Bizim studentlär aktiv pay alȇrlar, kendileri gelip, isteerlär. Makarki ilk günnär, açan haberledim, diildilär pek aktiv».  

Studentlär söleerlär , ani  donor olmaa deyni  kararı onnar düşüp tä kararladılar — istemäk yardım etmää taa kaaviydi, nekadar şüpelenmelär. Çünkü bu kolaylık kurtarmaa kimin  sä yaşamasını. 

«Bu pek önemni  insannara deyni, kim hasta, kimin var problemaları saalıınnan, bizä önemni yardım etmää, bu bizä bişey diil, ama onnara deyni bu pek lääzımnı.  Da varsa bölä kolaylık, neçin vermemää, bän altı keret verdim kan».

«Bän sayȇrım, ani vermää kan  maasuz bölä gündä, donor günündä, bu pek dooru hem lääzımnı. İnsanın varsa saalıı , neçin yardım etmemää te onnara, kimä o lääzım».

«Benim bobam  pek sık verer kan, da bän da kararladım  onun örneenä görä, vermää kan, ki yardım etmää  insannara, angılarına o lääzım». 

Hazırlayıcılar umutlanȇrlar , ani bölä olaylar  diil sade yardım ederlär saalıı korumak sitemasına,  ama terbieder  gençleri yardım etmää başka insannara da  cümnä cuvaplıını. Akţiya başarıldı, da nicä urguladı doktor, toplanılmış kan bu yakınnarda gidecek  regionun  medik kurumnarına.