Yortulu olay Yaradıcılık Evindä geçti. Burada topladılar üüredicilär, başarannar, üürenicilär, analar-bobalar hem musaafirlär, ki barabar nışannamaa kurumun istoriyasını, angısı artık 65 yıla geriler.
65 yılın içindä muzika okulundan birkaç evlad boyları çıktı. Kimä deyni sa o oldu ilk tanışmak muzikaylan, başkalarına — profesional yılın çeketmesi. Gagauziya kultura bakannıın başı Marina Semönova nışannadı, ani 65 yılın süresindä muzika okulu topladı o insannarın ecellerini, kim burada çalıştı, üürendi hem muzikaya canını baaladı.
MARİNA SEMÖNOVA Gagauziya kultura bakannıın başı
“Siz var nicä olasınız bir büük gözäl örnek diil sade evlad boyuna, biz büün gördük ne uurda siz onnarı terbi edersiniz — okadar incä, okadar kırnak işiniz var, ani var nicä olasınız bir örnek gibi bizä da, büüklerä da, herbir üürediciya da, angısı burada bulunȇr. Bän bütün ürektän dilerim sizä sade saalık, kısmet sizdä var, biz gördük, kısmet sizin okulunuza, kısmet sizin uşaklarınıza, angıları sizinnän bilä işleerlär, çalışȇrlar, angılarını siz üüredersiniz bütün ürektän sevmää kulturamızı, sevmää muzikayı, sevmää o işi, angısını seversiniz siz”.
Muzika okulun üüredicilerin üüsek profesional uurunu nışannadı Valkaneş dolayın başı Ivan Kreţu. O kutladı hepsini bu önemni yortuylan okulun istoriyasında. Meraklı, ani muzika okulun yıldönümü uydu okul başın Mariya Çernevanın duuma gününnan, nışannadı İvan Kreţu.
İVAN KREŢU Valkaneş dolayı başı
» İnsan açan sever kendi işini, onda hepsicii üüsek uurda olȇr. Bölä kişi o siz, Mariya İliniçna. Biz isteeriz onun profesional uurunu Valkaneş administraţiya adından nışannamaa şükürlük kiyadınnan”.
Valkaneş kasabasının primar yardımcısı Mihail Sürma kendi kutlamak sözündä soledi, ani üürenip muzika okulunda, uşaklar üüsek uurda kendi becermeklerini göstererlär.
MİHAİL SÜRMA Valkaneş kasabasının primar yardımcısı
“Üüredicilerin üüsek profesionalizma uuru, dayanmak, sevgi kendi işinizä verer kolaylık muzika okulun üürenicilerinä hem başarannarına almaa ilk erleri türlü konkurslarda, açıklayıp Gagauziya için başka devletlerdä”.
Valkaneş muzika okulun başı Mariya Çerneva urguladı, ani bu yılların içindä başarannar dünnenin türlü devletlerindä üüsek uurda bildidilär okulu.
MARİYA ÇERNEVA Valkaneş muzika okulun başın
“Çok büük başarlarlan geldik, neçin ani bu yaşa görä — 65 yıl o var nicä sölemää, ani çok ta aaz da, neçin ani bukadar yılın içindä bizim okul çok uşak kolverdi, bin uşaktan taa çok var nicä bizdä üürensinnär, binä kadar bitirdilär bizim okulu. Onnar şindi işleerlär başka erlerdä, başka padişalıklarda, çok keret ensedilär büük erlerdä, neçin ani onnar bizim okulun götürdülär hep adını, bizim işimizi gösterdilär, bizim suratımızı gösterdilär, biz sevineriz, ani bizim Gagauziya için bilerlär, söleerlär, bakarak bizim uşaklara, angıları bizdä üürendi”.
Yortulu programanın sınırlarında ayırı eri kapladı üüredicilerä Kultura bakannıından diplomnarın verilmesi. Hep ölä da başarannar da diplomnarı kablettilär. Muzika okulun istoriyası foto sergisindä da gösteriliydi. Burada çok patretlär toplanmışlar, angılarında üüredicilär hem başlar, başarannar hem üürenicilär. Çoyu onnardan kendi yaşamak paylarını muzika okuluna vermişlär.
DMİTRİY LİKA muzika okulun üüredicisi
«En paalı bizä deyni uşaklar. Onnar üürenerlär kendileri için, bizim için kendi yaşamakları için. En önemni o, ani onnarda kalȇrlar islää aklına getirmeklär muzika okulunda üürenmäk vakıdı için”.
Analar-bobalar büük sevgiylän okulun başlarını akıllarına getirerlär hem şükür ederlär herbirini,kim burada çalışêr.
“Benim kızım muzika okulunu başardı, akkordeon hem fortepiano uurlarında. İsteerim şükür laflarını sölemää Fulä İvan Georgieviça, angısı şindän sora yok bu dünnedä, yazık, ama benim kızım pek islää onda üürendi. O pek islää üürediciydi, okul başıydı, pek sevärdi uşakları. Şindiki direktor da Mariya İliniçna çok üüsek uurda işi götürer, var tehnologiyalar, uşaklar gelerlär. Bizim için bu büük sevinmelik, ani var kolaylık da uşakalr zanaatlanȇrlar muzikaylan”.
Elena Liçevskaya 80-ci yıllarda çalışarmıştı Valkaneş dolayın kultura bölümün başı. O söledi sıcak laflar o vakıtlar için.
ELENA LİÇEVSKAYA
“Pek gözäl ileri da insannar yaradıcıklan zanaatlanardılar. Muzika okulunda İvan Fulä ozaman direktordu, pek islää adamdı, hepsini üüsek uurda yapardı. Bän artık 40 yıl kulturada çalışȇrım, pensiyadayım çoktan , ama beni onnar unutmȇȇrlar, Mariya İliniçna beni teklif eder, sayȇr beni nicä üürediciyi, nasaat sorȇr kimär keret, o da pek büük işlär yapȇr, islää okulu götürer”.
65 yıl -o bir istoriya, angısını birkaç evlad boyları kurdular. Üüredicilerin, üürenicilerin, başarannarın barabar istoriyası, kimin için Valkaneş muzika okulu oldu yaşamanın önemni bir payı.