Kongaz küüyü V.Topal adına gimnaziyasının sport salonunda düzüntücülük işleri geçirilerlär. Angı işlär yapıldılar hem ne diişecek salonda işleri başardıktan sora, annattı üürenmäk kurumun başı Mariya Arnaut . Taa derindän süjetimiz.
V.Topal adına gimnaziyasının sport salonunda büük düzüntücülük işleri üürenmäk kurumun açılışından taa yapılmadılar. Üürenmäk kurumun öndercisi Mariya Arnaut annattı, ani bu iş baş daavaların arasında bulunardı.
MARİYA ARNAUT V.Topal adına gimnaziya başı
“Bu okul açılmış 1964-ci yılda , ozamandan buyanаdan bir sıra da olmamışlar bölä derindän remontlar. Bän kendim burada üürendim hem şansora 40 yıl da işleerim. Açan 2 yıl geeri bän önderci oldum, koydum neetimä az mı, çok mu, ama bir deerindän remont burada olsun”.
Düzüntücülük işleri üürenmäk kurumu kendi kuvedinnän yapamayaceydı, onuştan öndercilik seçti karar küüyün önderciliinä dä yardım için danışmaa.
MARİYA ARNAUT V.Topal adına gimnaziya başı
“Küüyün nasaatçılarına, primara, onun yardımcısına şükür ederim, ani onnar bizä finans verdilär da işlenildi burada 1,5 2 ay”.
Lääzımnı tedarlıkları hem avadannıkları satın almaa finans destää Gagauziya büceti uurundan da verildi, nışannadı M.Arnaut.
MARİYA ARNAUT V.Topal adına gimnaziya başı
“Şindi kalȇr sade oborudovaniye alalım. Burada da şükür ederim Bakannık komitetin önderciliini, Kristeva Natalyayı, ani destekledi bizi da bu salonda olacek herbir tertip eni”.
Salonda yapılan işlär başladılar duvarlardan hem başarıldılar erlärlän. Duvarlar, tavannar, erlär-herbir taraf enilendi, bu verecek kolaylık uşaklara taa uygun sportlan zanaatlanmaa, nışannadı M.Arnaut.
MARİYA ARNAUT V.Topal adına gimnaziya başı
“Koydular burada sport uurundan uşakları düşmeklerdän koruyan linoleum . İşlenildi burada bütün üreklän hem bütün havezlän.
Büünkü gündä V.Topal adına gimnaziyasında 344 uşak üürenerlär. Bu salondan çıkan üürenicilerin çoyu Gagauziyayı sport arenalarında andırdılar.
MARİYA ARNAUT V.Topal adına gimnaziya başı
«Çok yıllar bizim bu zalda uşaklar üürenärdilär basketbol oynamaa. İsteerim sölemää, ani burada terbiedildi çok sportçu, angıları kaldırdılar Gagauziyayı üüsek uura. Onnarın arasında İkizli Vani, Grahmez Nikolay”.
İşleri bir iki aftanın süresindä başaraceklar. Büünkü gündä uzmannar duvarları boyȇȇrlar hem resimneerlär, bundan sora yısıtmak sistemaları da geçirileceklär.