Gagauz dili –diil sade okullarda predmet olarak ama gagauz halkın en büük vaarlıı gibi büün üüreniler. Kongaz küüyü V.Topal adına gimnaziyasında bu uura önem veriler. 2025-2026-cı üürenmäk yılında gagauz dilini genişletmesi hem kullanması için gimnaziya ilk eri kazandı. Taa derindän süjetimiz.
Kongaz küüyü V.Topal adına gimnaziyası gagauz dilini genişletmesi hem kullanması programasına birkaç yıl sıravardı katılȇr, nışannadı üürenmäk kurumun başı Mariya Arnaut.
MARİYA ARNAUT Kongaz küüyü V.Topal adına gimnaziya başı
“Artık 5 yıl nicä biz katılȇrız bu akţiyaya, bu konkursa. Bizim üüredicilär dä başladılar katılmaa bu işä diil okadaradan zor. Artık bilerlär, ani lääzımsaydı yapacez. Yaparsaydık da, yapmayacez ötää-beeri, ama üüsek uurda yapacez hem gösterecez”.
Bu uurda üüsek başarılar için gimnaziya üüretmäk bakannıından ödül hem para premiyasını kabletti.
Bu üüsek notayı kabletmää deyni üüredicilär diil sade uroklarda, ama klastan dışarı olaylarını geçireräk hem başka okullarlan proektleri gagauz dilindä geliştireräk çok kuvet koydular, nışannadı V.Topal adına gimnaziyası gagauz dili üüredicisi Anna Stoyanova.
ANNA STOYANOVA V.Topal adına gimnaziyası gagauz dili üüredicisi
“Esap alȇrız, ani yıl — yıldan bizimnän geçirilän olayların papkası taa dolu olȇr. Biz savaşȇrız diil sade birtürlü urokları yapmaa yada klastan dışarı olayları, ama yayılȇrız başka türlü çeşitli işlerä. Bu üürenmäk yılında uşaklar pay aldılar Edu.dost proektindä hem gagauz dilini orada da kullandık. Ana-bobaları da bu proţesä aktiv katȇrız”.
Yıl-yılda uşakların havezi bu programaya katılmaya büüyer. Onnar diil sade beklesinnär, ama kendi tekliflerininnän da gelerlär üüredicilerä, nışannadı V.Topal adına gimnaziyası gagauz dili üüredicisi Marina Grozdeva.
MARİNA GROZDEVA V.Topal adına gimnaziyası gagauz dili üüredicisi
“İsteerim sölemää saaolsunnar o uşaklara, angıları bu işi dä sorȇrlar, meraklanȇrlar. Onnar pek isteerlär ilerletmää Ana dillerini hem katılmaa bu programaya. Onnarlan taa ilin işlemää dä”.
İlk er gimnaziyanın üüredicilerinä hem üürenicilerinä deyni o diil sade yılın süresindä gerçeklenän olayları notalamak, ama büük bir stimil hem destek ilerlemää hem Ana dilinin kullanması sferasını ötää dooru da genişletmää.