MD üüretmäk kodeksinä teklif edilän diyşilmekleri, MD Hükümet oturuşunda üüretmäk ministrusu Dan Perçun aşıkladı. Onnarın arasında bulunȇrlar -kaliteli üüretmäk sistemasını kullanmaa kolaylıı, 4-cü klaslar üürenicilerinä deyni notaları geeri çevirmäk, okulların finans serbestlii, diasporadan gelän uşaklarına dil üürenmesi koşulları, genç uzmannarı desteklemäk.
Üüretmäk kodeksinä teklif edilän diyşilmeklerin arasında bulunȇr diasporadan hem yabancı devletlerdän gelän uşaklara deyni rumun dilini üürenmäk koşulların kurulması. Bu programa verecek kolaylık uşaklara taa üüsek uurda rumun dilini üürenmää hem taa uygun devletin üürenmäk sistemasını kavramaa, nışannadı MD üüretmäk ministrusu Dan Perçun: «İlk diyşilmektä teklif ediler finanslamaa diasporadan hem aşırıdan gelän uşakların devletimizdä lingvistika integraţiyasını. Laf gider onnarlan rumun dili üürenmesi işin. Bir taraftan biz pek sevineriz, ani onnar Ana topraana dönerlär, öbür taraftan sa bizim üüretmäk sistemamız taa bitkiyädan onnara lääzımnı kolaylıkları vermeer».
Taa bir diyşilmäk, baalı başlankı klaslar üürenicilerinä deyni kimi predmeklerdä diskriptorları kulanmasının durgudulması. Teklif ediler rumun dili hem matematika predmetindä 2026-cı yılın ceviz ayın 1-dän notaları geeri çevirmää.
«Bu enilik için pek çok laf oldu. Onu isteerlär üüredicilär dä, üürenicilär dä. Büün bizdä sade diskriptorlar kullanılȇrlar, amma biz ikitaraflı biz çözüm duruma aarȇrız. Bunu lääzım pek dikkat yapmaa, ki uşak kolay başlankı klastan beşinciyä geçsin»,- nışannadı Dan Perçun.
Ministruylan açıklanmış diyşilmeklerin arasında bulunȇr genç uzmannarı desteklemäk teklifi dä. Destekleneceklär diil sade okullara işlemää gidän gençlär, ama koleclerä, professional-tehnik kurumnarına, üüsek kurumnara hem bilim kurumnara işlemää gidennär.
«Bu sırada destek kabledäbileceklär genç uzmannar, angıları aaraştırmak institutlarında yada üüsek üürenmäk kurumnarında hem doktorantlık uurunda işleerlär. Bununnan biz ademik uurunda çalışan gençleri destekleeriz»,- nışannadı MD üüretmäk ministrusu.
MD üüretmäk ministrusu açıkladı, ani konsultaţiyalardan sora bu enilikleri MD Parlamentinä bakılmaya teklif edeceklär.