Üürenicilerin bilgi uuru, hazırlanmak ȇkzamennara hem taa başka soruşları baktılar üüretim kurumnarın òndercileri kendi iş buluşmasında, angısını geçirdi Gagauziya üüretim bakannıı. Oturuş geçti Çadır kasabasının Mihail Çakirin adına liţeyindä.
Yapılan analizlerä görä, belli edildi, ani uşakların bilgi uuru türlü okullarda diir birleşik, onuştan lääzım taa çok dikkatlık olsun üüredicilerin hem administraţiya tarafından, dedi Gagauziya üüretim bakanı Natalia Kristeva: «Biz geçirecez açık dialogu, belli edecez o problemaları, angılar açıklandılar da savaşacez diiştirmää işi ölä, ani üürenmäk yılın sonunadan üürenicilär üüsek uurda hazır olsunnar».
Buluşmanın süresindä nışannandı, ani bölä diil birleşik çıkışların var çok türlü sebepleri. Onnarın arasında — duil üüsek motivaţiyalı üürenicilär, bilgilerindä boşluklar hem ani lääzım taa obyektiv olsun içindeki notalamak. Üüretim kurumnarın öndercilerinä sölenildi, ani taa sert kontrol lääzım olsun nicä uşaklar üürenerlär, eklemäk dersleri yapmaa da yok etmää bilmemezlii. Ayırı nışannandı. ani analar-bobalarlan lääzım barabar çalışılsın. Maasuz okul-aylä barabar çalışmak yardımcı olȇr üürenicilerdä cuvaplıı terbi etmää hem taa üüsek uura kaldırmaa çıkışları.
«Hep ölä da biz lafedecez hem bakacez diişilmekleri, angıları oldular üüretim kodeksindä. Üüretim bakannıı hazırladı eni dokumenti, angısına görä okullar reytinga görä notalanêrlar, bizdä bu iş 5 yıl olêr, ama alıp esaba enilikleri, biz onu diiştirdik»,- Nataliya Kristeva dedi.
Êkzamennara hazırlanmak soruşlarında kaarä direktorlar lafettilär hep ölä da ekzamen merkezleri için da hem koşullar için özel uşaklar için. Buluşmanın süresindä sölenildi taa olaylar için, angıları baalı Gagauz dili yortusuna. Okullar hazırlêrlar bu temaya görä dersleri, yaraşmaları, literatura buluşmalarını, angıları baalı gagauz dilin ilerletmesinä gençlerin arasında.