Kasım ayın 26 — da, yakın 3 bin 200 üürenici 9 — 12 kraslarından  devletin 74 üürenmäk okullarından geçtilär ţifra becermekleri testlerini. Ekzameni kurdu hem da geçirdi  üüretim hem da aaraştırmak Ministerlii barabar Millet agentstvosunnan. 

Gagauziyanın   üürenmäk kurumnarın 9 -12 — ci klasların üürenicileri, angıları geçtilär ţifra becermekleri testlerini nışannȇȇrlar, ani işlär pek meraklıydılar, kimi erlerdä zordu  da, ama bütündän  formatı sevdilär.  Bölä  bilgilerin kontrol etmekleri, onnarın laflarına görä, taa zamandaşlı hem da  annaşılı.  

«Geçti pek meraklı, kimi soruşlar halizdän zordular, çok düşündüm. Bu pek önemni, neçinki 21 asir, da lääzım gitmää tehnologiyalarlan bir yolda, da ileri dooru, cevaplar bo soruşlara  yardımcı olaceklar bizä ».

«Dışarda 21 asir, bu pek önemni. Kimi insannar, bilmeerlär  nesoysa kuralları, nicä kendini kullanmaa soţial baalantılarında, internetta».

« Bän sevdim testi geçmää, var nasıl sölemää, ani  kolaydı, meraklıydı. Bän sayȇrım, ani tehnologiyalar ilerleerlär pek hızlı, da biz, nicä üürenicilär, lääzım bilelim, nicä kullanmaa informaţiyayı».

«Ne için bu önemni? Neçinki  bu adım geleceya, tehnologiyanın giriştirilmesinä hem da kendinä  deyni. Savaşȇrız uymaa 21 asirin normalarına görä».

Kongaz küüyün Mihail Tanasoglo adına gimnaziya informatika üüredicisi Mariya Arnaut nışannadı, ani üürenicilär birdän açıkladılar fikirlerini pay almaa, bakmadaan ona, ani test rumın dilindä geçti — ama bu verildi diil hepsinä birtürlü. 

«Uşakların vardı kolaylıkları denesinnär kendi kuvetlerini, nekadar onnar bilerlär, nicä kullanmaa interneti, nicä kendini kullanma internetta, da elbetki var soruşlar, angıları ilişerlär üürenmäk proţesinä. Bu önemni zamandaşta, neçinki bizim uşaklar taa zeedä kullanȇrlar gadjetları, bilsinnär deyni, nicä kendilerini kullanma hem da nicä cevap etmää türlü soruşlara, angılarınnan onnar meraklanȇrlar»,- Mariya Arnaut nışannadı. 

Gagauziya Baş üüretmäk Bakanı temsilcileri çizgiledilär, ani bölä testlar — önemni adım ileri dooru. Gagauziya Üüretmäk bakanı başı   yardımcısı  işini bir vakıda götürän Mariya Ştiroy nışannadı, ani uşaklar lääzım gitsinnär bir yoldan tehnologiya ilerlemesinnän, hem da bilgilerin notalamak formatı lääzım uysun zamandaş işlerinä. 

Mariya Ştiroy, Gagauziya Üüretmäk bakanı başı  yardımcısı  işini bir vakıda götürän: «Uşaklar çıkȇrlar  testtan ii keftä, bu söleer onu, ani onnar cevap ettillär soruşların kimisinä,  denedilär  kendi becermeklerini, kuvedini. Testlamak geçer bütündän onlayın formatında, herbir üürenici kableder individual işi, koda görä».

Gagauziyada testlamak geçti üç merkezdä — Komratta, Çadır — Lungada hem da Valkaneştä. Ȇkzamenin çıkışlarından sora , her bir pay alan kabledecek sertifikatı, angısı belli edecek ţifra bilgilerin urunu, da yardımcı olacek gitmää ileri dooru üürenmää maasuz profildä — çizgileerlär  Gagauziya Üüretmäk Bakanı temsilcileri.