Komrattakı Ioan Predteçinin adıa klisesindä Kolada yortusuna kaarşı uşaklar kolada türkülerini çaldılar. Kliseya yaslalardan uşaklar geldilär. Onnar klisä izmetçilerini Hristozun Duuması yortusunnan kutladılar. 

Komrattakı Ioan Predteçinin adına klisesindä saabaalendän kolada türküleri öttülär habeleyip herbirinä ani Kolada yortusu geler. Bu olaya uşaklar kendi üüredicilerinnän hazırlanmışlar. 

Uşaklara, terbiedicilerä hem kliseyä gelän insannara danıştı klisä izmetçisi. O akıllarına getirdi neçin Kolada yortusu pek önemni herbir inanıcı kişi için. 

«Bu diil sade bir data belli edilän kalendardä. O bizim kurtarılmamız çeketmesi. Gün, açan insan Allahlan birleşer. Akına bu yortuya pek sevineriz. Bu sevinmelik nicä canımıza ölä da sırtımıza ilişer»,-  nışannadı Dmitriy Tanasoglo İoanа Predteçеnin adına klisä izmetçisi. 

Kolada türküsünün çalmasından sora klisä izmetçileri annattılar uşaklara Kolada yortusunun istoriyasını, neçin önemni seslemää, yardım etmää analara bobalara, yakın insannarı bakmaa hem iilik yapmaa. Önemni eri kapladılar halk adetleri hem onnarın korunması. Kendi düşünmeklerini bu yortunun önemniı için açıkladılar üüredicilär.

«Gagauziyada biz üürederiz uşakları 3 dildä, koruyêrız moldvan, gagauz hem rus halkların adetlerini. Bu pek önemni bizim ana tarafın hem ayleleri için». 

«Biz büün kliseyä geldik, biz bakêrĩz gagauz adetlerimizi, bu pek gözäl, neçin ki biz kaarşılêêrız Hristozun duumasını, biz göstereriz uşaklara, ani biz hristianız, var Allaah, da o koruyêr bizi. Hem kim istreer var nicä gelsin da dua etsin».

«Biz bu olaya hazırlanêrĩz, üüreneriz türküleri, şiirleri. Uşaklar büük havezlän göstererlär, annadêrlar. Büün biz kliseyä geldik, Koladaya kaarşı, klisä izmetçilerini kutlamaa, hep ölä da şiirleri hazırladık. Sanêrım, ani açan biz uşaklara gösterecez sevgiyi gagauz, romın halklarına , bizim  adetlerä, ozaman uşaklar bileceklär, neçin ki biz annadêrız, biraz da evdä annadaceklar analar-bobalar».

«Biz uşaklarlan bakêrız adetleri, her gün Hristozun Duuması yortusu için lafederiz. Üüreneriz şiirleri, traditiyaları annadêrız».

Uşaklar annattılar nesoy Kolada yortusununu kendi aylelerindä nışannêêrlar.

«Biz kolada gezeriz anamnan hem bobamnan».

«Biz aylämlän gözäl masayı donadêrız».

«Kolada o Hristozun Duuması yortusu».

Bu gündä herbir uşak tatlı baaşışı kabletti. Yortunun sonunda Dmirtiy Tanasoglo danıştı hepsinä kutlamaklarlan.

«Bütün candan isteerim hepsi pravoslav hristiannarı hem hepsi yaşayannarı kim seviner bu yortuya, kutlamaa Iisus Hristozun Duumasınnan. Hepsi dilemää usluluk, saalık hem Allaah hepsini korusun»,- nışannadı Dmitriy Tanasoglo.

Klisedä toplanan musaafirlär urguladılar, ani pek önemni adetleri hem din zenginniklerini evlad boylarına açıklamaa, korumaa hem kurmaa diri baalantıları uşaklarlan.