Mardın sekizi — karıların halklararası günü. Bu günä karşı Gagauz Erinin herbir uşak başçasında yortulu olaylar geçirildilär. Uşaklar analarına deyni terbiedicilerinnän birliktä türlü sürprizleri hazırladılar: şiirlär, türkülär, oyunnar hem kendi ellerinnän yapılı kutlamak kartları. Bizim çekim grupamız bölä bir olayda bulundu. Nicä Komradın 8-ci uşak başçasının terbiedenneri kendi analarını kutladılar annadȇr benim kolegam Anna Çebanova.
Komradın 8-ci uşak başçasının terbiedenneri kendi analarını hem babularını Karıların halklararası gününnän kutladılar. Yortulu olay gagauz hem devlet dillerindä geçirildi. Herbir uşak yaradıcılık uurunda kendi becermeklerini gösteräbildi. Erkenki üüretim kurumun başı Mariya Kıssa haberledi, ani uşaklar büük hevezlän hem meraklan bu yortuya hazırlandılar: kutlamak açık kartlarını yaptılar, şiirleri hem türküleri üürendilär. Terbiedicilär onnara yardımcı oldular. Nicä çizgiledi Mariya Kıssa yortu gözäl hem renkli geçti.
«Büün biz analarlan-bobalarlan birliktä toplandık Karıların halklararası günününü kutlamaa deyni. Yortulu programamızı iki dildä hazırladık: devlet hem gagauz dilllerindä. Saa olsunnar analar-bobalar, bizä yardımcı olȇrlar»,- Mariya Kıssa çizgiledi.
Büük grupanın terbiedicisi Olesä Sırbu çizgiledi, ani busoy yortulu olayların baş neeti — göstermää uşakalra nekadar önemni sevgi duygusu hem şükürlük analara-bobalara. Uşaklar busoy yortulara büük havezlän hazırlanȇr, açıkladı Olesä Sırbu, çünkü bilerlär, ani anaları musaafir olacȇklar.
«Bizim baş neetimiz göstermää, ani ana — en önemni hem paalı insan herbir insana deyni bu dünnedä. Biz üürederiz uşakları şükürlü olmaa. Uşaklar büük havezlän hazırlandılar bu yortuya hem baaşışları hazırladılkar»,- Olesä Sırbu çizgiledi.
Analar açıkladılar, ani busoy yortular onnarın cannarına dokunȇrlar, özel ȇmoţiyaları baaşlȇȇrlar hem dä çok yıllara akıllarında kalȇrlar.
«Bu yortuları kaçırmamaa savaşȇrım. Geldiynän dä pek dalgalanȇrım. Bu yortular pek gözäl geçerlär. Bän buna pek sevinerim».
«Biz bu yortuları bekleriz, haliz Karıların halklararası gününnä adalı yortuyu, çünkü o pek önemni. Uşaklar pek gözäl hazırlanȇrlar. Bu sţenariy, türkülär, şiirlär, kutlamak lafları — hepsi canımızda kaldı. Keefimiz pek islää. Taa birkaç gün üzümüzdä gülüş olacȇk».
«Bän sevinerim, ani bizim uşakalrımız bu yortulu olaylarda gagauzça lafederlär. Hep ölä kutlȇȇrım hepsi anaları Karıların halklararası gününnän».
Komradın 8-ci uşak başçasının terbiedenneri kendi analarını hem babularını Karıların halklararası gününnän kutlayarak onnara en gözäl kısmet duygularını baaşladılar.