Ferapontyevka küüyündä uşak başçası bir aydan zeedä işlämeer. Bu zaman analar-bobalar var olan problemadan kendibaşına savaşȇrlar çıkışı bulmaa, kiminnän uşakları brakmaa. Kimsä evdä durȇr da kendi hem komşu uşaklarını bakȇr. Başkaları uşaklarını işä alȇrlar, aylelerä deyni bu durum problemaya döndü.
«Uşak başçası bir buçuk ay işlämeer, bän evdä durêrım da kendi uşaamı bakȇrım, ama komşuykam uşaanı yalvarıp bana brakȇr, zerä insan çalışȇr. Analara-bobalara zor bu ara geler. Uşak ne bilärdi, başladı unutmaa. Zerä yazın evdä çok iş var. Biz okadar uşaklara dikkatlıı verämeeriz, nicä yaslada onnarı üürederlär».
«Benim uşaam saat 7-dän 6-dan benimnän iştä bulunȇr. Onu yok kiminnän brakım. Anam yatalak».
Problema, angısı küüdä peydalandı, ani yasla çalışmȇȇr, belli etti küüyün primarı Elena Odnostalko. O bildirdi korkusunu, ani uşak başçası var nicä hiç ta açılmasın.
«Uşaklar Tomay küüyündän, ani bizim yaslaya gelärdilär, kendi küüyünä döndülär. Bizim küüdän kimi uşaklar Komradın, Avdarmanın yaslalarına başladılar gezmää. Uşak başçası var nicä açılmasın, ani az uşak kalacek».
2026-cı yılın avgust ayında gimnaziya-uşak başçası Marko-Vovçok adına sade yasla gibi kaldı, onun hepsi çalışmak davaları hem varlıı erindeki nasaata geçti. Ama Gagauziyanın Genel üüretim bakannıı kararladı, ani uşak başçası sentäbrinin birindä mutlaka lääzım ilerletsin işini. Ama temel dokumentleri – Ustavı hem çalışannara verilän hakı erindeki nasaatın pay alannarı ölä dä inandırmadılar.
«Primar 16,15 çalışmak erini teklif ettı, üç terbiedici, biz sä 4 koyduk. Uşak başçasında çalışmak gününü uzattık, ama sıradakı annaşmamak peydalandı».
Gagauz Eri Üüretim bakannıın başın Kristeva Natalyanın laflarına görä uşak başçasının işlemesi için erindeki kuvetlär cuvaplı.
«Neyi biz Ferapontyevka küüyündä gözlederiz? Göreriz, ani burada yok bir bakış. Hep ölä uşak başçanın ötää dooru işlemesi için kuvet koyulmȇȇr. Büün sentäbrinin 8-zi. Üşak başçası işlämeer. Analar-bobalar uşaklarını yakında bulunan uşak başçalarına götürerlär. Annȇȇrız, ani bu durumu diiştirmäk için bişey yapılmarsa küüdä uşak başçası olmayacȇk. Biz büün buraya yardım etmäk için geldik. Direktora yarım stavkayı vererlär – bu yok nicä olsun, çünkü görev cuvapçı».
Nataliya Kristeva hep ölä belli etti, ani küüdä çıkan kararlar cümneyä lääzım bildirilsinnär.
«Nasaatın oturuşuna geldiynän, proektlär kararlarını bulamadık, makar ki kanona görä, onnarlan en az 3 gün öncä, lääzımdı tanışsın küüyün öndercilii, yaşayannar».
Açıklamaklardan sora, nasaatçılar aralık verdilär, ki teklif edili kararları yazdırmaa. Analar hem bobalar sa umutlanȇrlar, ani son kabledili kararlar uşak başçasının açılışına getireceklär.
«Geldim cuvabı almaa küü nasaatından, ama işitmedim. Kararı lääzım alalım şansora».
Uşak başçanınişi için soruş bu zamana hep taa kapalı kalȇr, kiminnän uşakları brakmaa.
С.Димитрогло С.Георгиев А.Герчу