«Duan» lageri — o diil sade dinnenmäk için, ama gerçektän yaşamak okulu, neredä uşakları üürederlär olmaa cuvaplı hem çalışmaa komandada. Kıpçak küüyündä lager açıldı 12-ci keret, toplayıp 55 uşak 12 yaşından hem taa büük.
Telefonsuz hem internetsiz — sade uşaklar, natura, üüredicilär hem haliz hazırlamak yaşamaya. «Duan» lagerindä her gün meraklı: kalkêrlar saat 6, sport yapêrlar, sabaa imeeni ierlär sora da herkezi kendi işinä gider. Burada üürederlär imää yapmaa, ruba yıkamaa, ardına toplamaa hem insan olmaa. Lagerin programasında var meraklı predmetlär hem, elbetki, türlü zorlukları geçmeklär. Bu gündä çukur aşırı kanatta geçmäk. Giindi hepsi lääzımnı tertiplär, koruntuluklar hem instrukţiya kuralları sölenildilär. Hepsi biraz dalgalandı, ama geçtiynän kanattan uşaklar dolu emoţiyalarlan.
«Bän pek beenerim burada, ama var zor işlärdä.. Biz onnarı geçeriz, onnar kaavilär için. Nasaat ederim hepsinä gelmää bu lagerä, onnar olaceklar taa cuvaplı, taa kaavi».
«Bän geldim lagerä neçin ki severim hepsi bölä zorlukları, uyumaa palatkalarda.. Bizdä var derslär da burada..annadêrlar bizä lagerin istoriyasını, nesoy ateş yapmaa, nesoy süündürmää.. Üürettilär kompaslan da işlemää. Pek meraklı hem şen».
«O vakıt açan bir bölüm zorlukları geçer, öbürleri derslerdä bulunêrlar hem imää yapmakta. Menüda bu gün borç ülen için. Kızlar cuvap ederlär imäk yapmak için çocuklar da ateşin dolay yanında – süünmesin».
«Pek severiz, türlü — türlü imeklär bizdä. Üülendä bizdä taa sık borç..Pek gustlu doyurêrlar. Var bizdä burada başımız, kim üüreder türlü imekleri yapmaa ki biz bilel da kendi aylelerimizä yapalım».
«Hepsi bunnar bizä lääzımnı olaceklar yaşamakta, bunnarlan biz kaarşı gelecez..Çocuklar ateş yakêrlar, kızlar da imää yapêrlar bän pek beenerim burada».
Nicä nışannadı lager üüredicisi hem klisä izmetçisi Födor Karakalçev- «Duan» lageri o bir girginnik okulu, angısı terbieder kızları hem çocukları hem hazırlêêr onnarı haliz yaşamaya.
«Herbir uşak üürener yapmaa te onu, neyi lääzım bilsin. O yapêr imää, o üürener kendi rubalarını yıkamaa, üürenerlär üstelemää kendi haylazlıını, getirnää fayda hem kendinä, hem kiminnän sän bulunêrsın, yapmaa iilik, kimisä kurtarmaa, yardım etmää. Biz ona deyni yaradılma»,- klisä izmetçisi Födor Karakalçev nışannadı.
Bu yıl «Duan» lageri açıldı 12-ci sıra hem topladı 55 uşak. Kimsä burada ilk keret, ama var onnarda, kim geler burayı birkaç yıl sıravardı. Hepsi bu uşaklar söleerlär, ani bilgilär, angılarını onnar burada kablederlär lääzımnı hem faydalı olaceklar onnara yaşamak yolunda.