Üç günün süresindä, Baba Marta ayın 26 – dan – 29 – dan akademik Todur Zanet tek kişi Gagauziyadan bulundu Türkiye devletin Ankara kasabasında — türk dünnesinin Kongresindä, angısına katıldı 140 kişi türlü memleketlerdän. Toplantıyı kurdu hem geçirdi Türkiyenin kultura hem turizma ministerlii.
«Türk dünnesinin yayınnamak işin kongresi» adalı yayınnamak için strategiya rolünu kultur anmak korumasında, bilgilerin dadılmasında hem da cümlelerin aralarında kaavileşmesi. Kongresin işindä çalıştı altı komissiya, angıları öncä daadıldılar, haberledi akademik Todur Zanet. Komissiyanın herbir temsilcisinin vardı kolaylıı Kongresin çeketmesinädän hazırlamaa kendi görüşünü hem da soruşlarını.
«Bän çalıştım «Bütünnä alfavit hem dil» komissiyasında, pek meraklıydı komissiya, pek meraklıydı iş, pek meraklı insannardı. Pek genişti hem derindi iş. İşin başarılmasında Komissiya kabletti kendi rezolüţiyasını hem protokolu», — akademik Todur Zanet haberledi.
«Türk dünnesinin yayınnamak işin kongresin» neeti sayılȇr kaavileştirmää bütünnä türk dünnesinin bakışını yayınnamak işin uurunda. Toplantının başarmasında, komissiyalarının herbir öndercisi okudu komissiyanın kararını, angısı girecek bir kiyada. Bundan sora, komissiyanın çıkışlarına görä kurulacek ileri dooru yayınnamak işin planı.
«Bu pek şannı, bu pek büük saymak, ani bizi teklif ettillär «Türk dünnesinin yayınnamak işin kongresinä». Toplantının pek üüsekti uuru. Da erli, bölä üüsek uurda geçirän Kongresa çarıldı Gagauziyadan temsilci, ozaman bän sayȇrım, ani bu büük saygı nicä gagauzlara, ölä da bütünnä Gagauziyaya. Pek önemni, ani bizi teklif ettillär»,- akademik Todur Zanet haberledi.
«Türk dünnesinin yayınnamak işin kongresin» işin süresindä katılannar diiştilär bilgilärlän yayınnamak işin soruşlarında, türk dilin, tiparlamak, öndercilik, üüretim hem çevirmäk uurlarında. Komandalar, angıları kuruldular başka devletlerin temsilcilerindän, hazırladılar cümleleri, angılarını açıkladılar.