Büün Gagauziyanın hepsi okullarında ilk üürenmäk günün çanı öttü. Tülüküü Saveliy Ekonomovun adına liţeyindä yortulu olay geçti, adalıydı Sentäbrinin birisinä.

Bu yıl Tülüküü Saveliy Ekonomovun adına liţeyindä birinci klasa 18 uşak geldi üürenmää. Eni üürenmäk yılınnan hepsi uşakları, üüredicileri, anaları-bobaları kutladı Gagauziya ekonomoka ilelremesi  bakanı Larisa Çerven hem dua etti, ki eni üürenmäk yılı uşaklar için olsun dolu türlü meraklı işlärlän. Liţeyä baaşlandı interaktiv tabla.

«Sentäbrinin biri — o herzaman bir vakıt, açan enilikleri bekleeriz, eni umutları, başarları. Kutlêêrız sizi, olunuz açık eni bilgilerä, meraklanın hepsinnän, koyun soruşları hem her gün kendinizä eni işleri açınız»,- Larisa Çerven nışannadı.

Tülüküü primarı Nataliya Popova urguladı, ani okul adetleri lääzım herzaman bakılsınnar, hem nışannadı, ani uşaklar küüyün gelecää.

«İsteerim dilemää bütün üürenicilerimizä saalık, ani onnar bu dünnedä olsunnar saygılı biri-birinä. Hem bu yaşamakta, üürenmäk yolunda alsınnar hepsi bilgileri, çünkü bilgilär çok önemni»,- nışannadı primar.

GHT deputatı Mihail Popov şükür etti üüredicileri onnarın çalışmakları için , uşaklara da dua etti büük başarları üürenmektä.

«Bän dua ederim sizä , paalı uşaklar, ki bu üürenmäk yılı geçsin pozitiv uurda, ki siz kabledäsiniz çok üüsek bilgileri, biri-birinizi sayasınız , seväsiniz, ii başarlar sizä, uşaklar»,- dedi deputat.

Liţeyin direktorun yardımcısı terbietmäk uurunda Marina Haritova kendi kutlamak laflarını söledi uşaklara.

«İsteerim bizim uşakları kutlamaa büünkü günnän, dilemää onnara en önemni — saalık, kısmet, hem da üüüsek notaları alsınnar»,- dedi Haritova.

Uşaklar büünkü gündä paylaştılar kendi duygularınnan geçmiş yaz vakıdı için hem söledilär nesoy keflän okula geldilär.

«Yaz pek islää geçti, yalan sölämeyecäm. Okula hazırım, artık 4 klası üüsek uurda başardım».

«Pek sevindim, ani enidän okula geldik. Evdä artık bıktıydık, okula istäärdim, burada benim dostlarım».

«Yazı pek islää geçirdim, şen, çok erlerä gittim, ama şindi okula geldim, pek beenerim, burada da var benim dostlarım».

«Elbetki beendim yaz vakıdını, çok şendi. Sindi geldim üürenmää, dostlarımnan buluştum, geçerim 4-cü klasa».

Hepsi üürenicilär için bu gün oldu büük bir sevinmelik hem taa bir okul sayfasının başlaması.