TRM cümnä kompaniyası temsil etti kendi illerlemäk strategiyasını 2026–2030yy. O doorulu kaavilettirmää kompaniyanın durumunu  hem yapmaa onun işini   zamandaş media  koşullarına görä.

TRM  illerlemäk strategiyalarına girer tehnik bazanın modernizaţiyası, ţifra tertiplerin giriştirmesi hem uzmannarın zanaat üüselmesi, redakţiya cuvaplıın kaavileşmesi,nışannadı kompaniyanın genel öndercisi Vlad Ţurkanu: «Bu dokument yardım eder bizä annamaa, nesoy adımnarı lääzım yapmaa gelecek yıllarda, biz işlämemää deyni görmedään,ama düşüneräk çalışalım, bilärkenä işi.O yardım eder taa derindän  annamaa,ne lääzım yapmaa, nesoy işlärlän karşılaşȇrız, angı davaalar önümüzdä taa uzun zamana.Bundan kaarä, bu dokument önemli insannar için,angıları burada çalışȇrlar,angılarına lääzım açık görgü kiyatta, annamaa deyni, ne onnara lääzım yapmaa».

TRM illerlemäk strategiyası doorulu kaavileştirmää cümnä yayınnamak kompaniyasını nicä baamsız hem ii informaţiya sızıntısını,angısının baş davaası kalȇr dooru kontent, urguladı genel öndercinin yardımcısı, Moldova1 televizionun başı  Andrey Zapşa: «Onun paası onda, ki bu erindeki mal,o informaţiya,angısı burada olȇr.Bän sayȇrım,ani bizdä ii hem dooru  kontent hem programmalar, almaa  esaba deyni ne olȇr bizim erdä. Biz diil büük devlet,ama hep okadar da burada çok iş olȇr.Düşünerim,ani günün en açık haber resimini var nicä kabletmää salt Moldova1 televizionundan».

Radio çalışmasının neetlerini açıkladı bu bölümün başı Kornel Çobanu: «Biz illeri dooru da auditoriyanın hepsi uurlarına illerledecez haberleri taa uygun açıklamaa – laf gider subtitralar için , işitmeyan insannar için çevirmek olsun deyni savaşacez hem audio yazdırmalar olsunnar hem neetleriz kurmaa ţifra platformaları kullanmak için».

TRM neetlener kaavileştirmää kendi işini internet uurunda da, hem kaldırmaa radio hem televizion programaların kalitesini. Dokument kuruldu ekspertlerin İon Bunduki hem Natalya Gorçak yardımınnan da var nicä olsun örnek gibi başka media kompaniyalarına, nışannadı ekspert İon Bunduki: «Bölä dokument lääzım olsun hepsi strukturalarda, bu sayıda TRM  hem GRT.Neçin zerä bu nışannȇȇr,ani göreriz neeti,angısına lääzım gelelim bir, iki,yada üç yıldan sora.Bu uurda belli edili 2026-2030 yy.,ne nışannȇȇr,ani TRM kurdu bu strategiyayı,da nışannȇȇr,ani 30-cu yıladan neya etişecek. Akţent koyulȇr ona, kurmaa deyni cümnä yayınnamak kompaniyanın missiyasını. Bu ne nışannȇȇr? Vergi  insan öder izmet için,da bekleer kaliteli malı».

Neetlär, yazdırılı strategiyada, şansora giriştirilerlär, nışannadı Audiovizual Nasaatın viţe-başı Aneta Gonţa: «Sanȇrım,ki o neetlär,angıları teklif edilerlär yakın yıllara,kimi uurda şansora giriştirersiniz hergünkü işinizdä, kendi içindeki politikalarınızda, da bu haliz gözäl hem dooru».

Strategiyanın temsil etmesindä pay aldılar mass mediya kurumnarından kişilär hem ekspertlär. GRT cümnä kompaniyanın başın işini götürän Yaroslav Bulgaru nışannadı,ani ilerlemäk strategiyası –önemli dokument. O urguladı,ani GRT kompaniyası lääzım çalışsın onun kurmasında.

«Bän sayȇrım,ani bölä dokument bizim kompaniyada da lääzım olsun.Halizdän lafederiz onun için, ama taa yapamȇȇrız.Sayȇrım,ani lääzım gelelim, bakalım, üürenelim dokumenti,angısını kurdu TRM, barabar hepsi ekspertlärlän, alalım hesaba ne bizä bu uurda lääzım,da kuralım kendi strategiyamızı,doorudalım kompaniyamızı o uura, nasıl dokumenttä yazdırılacek»,- Yaroslav Bulgaru nışannadı.

Moldovada çalışȇr  iki cümnä kompaniyası.TRM hem GRT. TRM birleştirer Moldova1 hem Moldova 2 televizion kanallarınını hem radiostanţiyalarını.