Yakın 90 sportçu Moldovadan, Ukrainadan hem Türkiyedän birleştilär halklararsı üüredicilik- sport toplantısında. Komrat muniţipiyanın baş sport zalı oldu arena, neredä sportçular başka devletlerdän kendi becermeklerinnüän pay oldular. Nicä geçti iki kerä gündä sınışlar hem neyä üüredärlär trenerlar türlü memleketlerdän — bakınız süjettä.
Altı günnük marafonun têkvondo toplantısının baş neeti — çıkarmak atletleri adetli komfort zonasından hem vermäk praktika türlü-türlü şkolların hem stillerin konkurentlarınnan. Regional sport liţeyindä hem sportkompleksin zalında türlü memleketlerdän sporçular ustalıını kavileştirerlär eni sport sezonun önündä, söledi Türkiyedän trener Murat Işık.
MURAT IŞIK thêkvondo treneri, Türkiye
«Bizim neetimiz burada — birleştirmäk bir meydanda insannarı, aslına bakarsan, bir kultura baalı olannarı. Bizim var neyä üürenmäk Gagauziya sportçularından, hem onların — bizdän. İnanêrım, ki bölä birleşik iştemäklän bu sportçular en islää becereceklär göstermää kendi memleketlerini hem halklarını Evropanın hem dünnenin çempionatlarında.»
Türkiyedan musaafirlär nışannadılar, ki uşaklar salt becermek almazlar hem sınış yapmazlar, ama daa dinnenerlär.
«Uşaklar da pek mutlu kaldılar . Nasıl bän söledim, onnar, nicä biz dasevinerlär. Hem kulinariya adetleri, hem genel atmosfera burada ölä kardaşça. Çocuklar söleerlär ölä, sanki buraya çok kerä geldilär.»
Têkvondo baş prinţipi — saygı. Hem da tatamidä güreşmäk bir bal için da, meydan dışarısında dört memlekettän sportsmennar kolay bulêrlar ortak dili çeviricisiz, bildirtti trener Oleg Çernıy.
OLEG ÇORNIY thêkvondo treneri, Kişinöv
«Getiriniz akıla: 6 gün toplantılar, iki sınış gündä. Hem eer sınış — sendä var üüsek klaslı partnerlar türlü memleketlerdän hem en islää sportsmennar senin memleketindän. Hem sän işlersin onnarlan her gün iki saattan zeedä, iki sınış, deyiştirip. Bu ekvivalent 7-8 yarışlara hepsi bir erdä.»
«Toplantılar geçerlär pek islää. Bän sayêrım, ki bölä olaylar lääzım nekadar çok — bu unudulmaz hem pek faydalı becermek. Başka memleketlerdän sportsmennarın hazırlıı pek üüsek uurda, hepsi sınışlar geçerlär maksimal vermäklän.»
«Toplantılar geçerlär pek islää. Önemni pay almaa, çünkü burada toplanêrlar sportsmennar çok memlekettän. Biz yaşêêrız bir erdä, biz bir erdä sınışları yapêrız, becermeklerlän diişeriz. Biz dayma bulunêrız bir erdä, konuşêrız, bu pek önemni — kontakt yapmaa insannarlan başka memleketlerdän, eni tanışlıklar kurmaa hem hepsi bölä.»
«Bizä lääzım çokça gitmäk bölä olaylara hem da çok bir erdä sınışları yapmaa. Biz isteeriz, ki bölä toplantılar devam etsinnär. Da, bän alêrım eni becermek. Sparring yapıp hem trenirovka yapıp bu erli çocuklarlan, bän olêrım taa islää. Bän isteerim gelmää genä. Pek islää er. Biz isää vakıt geçirdik sınışlarda, hem atmosfera burada pek hoş.»
“Hepsi geçer pek gözäl, saaolunuz hepsi için! Elbetki, biz yorulêrız, ama bu hoş yorulmak. Güreşlerdä hepsi bu dönecek bizä islää produktivliklän hem en islää rezultatlan. Biz kısmetliyiz hem hoşluklan trenirovka yapêrız.»
Atletlerin önündä var kısa pauza dinenmää hem almaa kuvet, sora — çıkmaa halklararası turnirlara.