Gagauziya Regional Hatalı olaylar bakannıı geçirer haberlemäk kampaniyasını, angısının süresindä yaşayannara annadȇrlar sobaları dooru kullanmak kurallarını. Bu iş yapılȇr neetlän çekmää yaşayannarın dikkatlıını yangın peydalanması olaylarına.
Suukların gelmesininnän Gagauziya Regional Hatalı olaylar bakannıın uzmannarı yangın olaylarını azaltmak hem sobaları kullanarkana tütmeklerä dikkat çekmäk kompaniyasını geçirerlär. Yaşayannara annadılȇr ne lääzım yapmaa bu işlärlän karşı gelmemää deyni hem nereyi danışmaa hatalı olaylan karşı gelärsän. Haberlemäk kompaniyası avtonomiyanın hepsi küüylerindä hem kasabalarında geçiriler, yaşayannar bunu annayışlan kablederlär, nışannadı Gagauziya Hatalı Olayları bakannıın uzmanı Ni̇kolay Ni̇kologlo: «Bizim kompaniyamız pek önemni adım insannarı korumakta. Taa çoyu insannar bizi annȇȇrlar, ama var öleleri dä, angıları işitmää istämeerlär hem esaba bizim tekliflerimizi almȇȇrlar».
Gagauziya Regional Hatalı olayları bakannıın uzmannnarı annadȇrlar yaşayannara, ani her yıl yısıtmak vakıdın çeketmesindä sobaları hem tütün trubalarını kontrol etmää lääzım hem lääzımsaydı paklamaa onnarı. Küçük kuralları bakması insannarın yaşamaklarını korusunnar yakışȇrlar.
«Tutuşturaceykana ilk sıra sobayı en ilkin lääzım pek dikkat kontrol etmää yok mu sobada, yada onun dolayında çatlaklar. Solukluu bitkiyädän kapamamaa yada onun bir köşesi herzaman biraz açık lääzım olsun ki tütün yakışsın dışarı çıksın. Pek dikkat olmaa lääzım odunnarlan da, herbir soyda odun birtürlü yanmȇȇr».
Yaşayannara annattılar nesoy dooru sobaları kullanmaa, angı tertipleri tutuşturarkana kullanmaa hem angı kuralları sıkı tutmaa. Kirsovo küüyü yaşayanı Elena Nedälkova sobaylan her yıl yısınȇr. Bu yıl sobayı taa bir sıra da yakmadı, ama hepsi lääzımnı profilaktika işlerini taa yazın geçirdi.
«Lääzım pek dikkat bakmaa hem paklamaa. Bän bu işi pek dikkat yapȇrım. Bendä var bir adam, angısı geler, kontrol eder, lääzımsa paklȇȇr. Bu uşak oyuncaa diil, herbir insan pek dikkat olsun lääzım»,- Elena Nedälkova nışannadı.
Annatmaklardan kaarä uzmannar daadȇrlar insannara kiyatları da, angılarında bu kurallar yazdırılȇrlar. Ayırı dikkatlık veriler yalnız yaşayan yaşlı insannara, angıları eski sobaları yısınma deyni kullanȇrlar.
«Biz hem odunnan hem gazlan isınȇrız. Korkunç, ama biz pek dikkat sobayı yakmaa savaşȇrız. Dikkat olmaa lääzım diil sade odunnan, ama gazlan yısınan sobalarlan da».
Uzmannar nışannȇȇrlar, ani taa sık soba tütmesi olayları karşı gelerlär o evlerdä, neredä sobaları çoktan paklamadılar, yada sobalar çoktankı. Bu yılın yısıtmak sezonunda şansora var olaylar, açan insanın kafasına soba tütünü urdu, nışannadı Nikolay Nikologlo: «Bölä olaylar vardı hem Komrat, hem Çadır, hem Valkaneş dolaylarında. Bir olay insan kayıplıına getirdi».
Uzmannar nışannȇȇrlar, ani pek kısa hem zor olmayan kurallar yaşamayı kurtarsınnan yakışȇrlar. Haberlemäk kampaniyası bütün yısıtmak vakıdına sürtecek. Onnar açıklȇȇrlar, ani eer yangın peydalanarsaı, yada soba tütmesi olarsa osaat 112 nomerinä danışsın lääzım.