Gagauziya Halk Topluşun deputatları kablettillär spikerin Konstantinov Dmitriyin iş görevindän çıkmasını.
Gagauziya Halk topluşun oturuşunda Dmitriy Konstantinov haberledi, ani onun iş görevindän çıkması saalııın halınnan baalı.
«Kritiklerin çoyu inandırardılar, ani benim baş neetim — kalmaa iş erimdä, da te bunnan bän sansın bän oyalattım seçimnerin datasını. Bän sayȇrım, ani şindi te bu insannar annadılar, ani bu hiç bir dä zaman diildi benim baş neetim»,- Dmitriy Konstantinov haberledi.
«Proţedura lääzım reglamentä görä geçsin. 9 statya. İş görevin maanası. Biz yok nicä kimseyi zoruna işlettirmää. Dmitriy Georgieviç açıkladı kendi danışmasını»,- Nikolay Ormanjı haberledi.
Oturuşun odasında vardılar 26 deputat. Spikerin iş görevindän çıkması için ses tuttular 21 kişi. GHT başın bir vakıda işini götürmää deyni bakıldı iki onun yardımcıların kandidaturaları.
Georgiy Leyçu söledi, ani spiker olmaa istämeer, da onun için ses vermesinnär. Nikolay Ormanjı ayırıldı çoyu seslärlän kanondakı bölümün öndercisinin bir vakıda işini götürän görevinä.