Gagauz Eri Üüretim bakannıı eni konkursu haberleer. Üürenicilär var nicä pay alsınnar. Onnar gagauz dilini soţial medialarında ilerletsinnär lääzım. Bu konkursun kurması için üüretim bakannıın uzmananrına ihlam verdi hem örnek oldu Komrat kasabasının G.Gaydarcı adına liţeyin üürenicisi
Mariya Petkoglo. Mariya geçennerdä telegram kanalını kurdu. Burada o ana dilindä yaratmaları okuyȇr, onnarın avtorları için annadȇr hem gagauz halkı kulturasını açıklȇȇr. Büünkü gün Mariyanın telegram-kanalını 100-dän zeedä kişi okuyȇr hem siireder.
Kanalın prezentaţiyası geçennerdä oldu. Mariya Petkoglo üüredicilerä onun için annattı.
«Neçin Telegram? Çünkü gençlär burada çok vakıt geçirerlär. Biz isteeriz, ki bu vakıt taa meraklı hem faydalı olsun»,- Mariya Petkoglo annattı.
Gagauz Eri Üüretim bakanı Nataliya Kristeva eni konkursu haberledi.
«Biz isteeriz, ki üürenicilär kendi kuvedinnän soţial medialarında ana dilimizi ilerletsinnär. Biz sonuçta notalayacȇz onnarın kontentini, hep ölä esaba alacȇz, kaç kişi onnarın kanallarını okuyȇr hem siireder»,- Nataliya Kristeva haberledi. .
Konkursun tarayıcılarına diplomnar hem premiyalar verileceklär.