Moldova devletindä hazırlanȇrlar üürenmäk okulların reorganizaţiyasına, angılarında üürener az üürenici. Diişilmeklär ilk ilişeceklär gimnaziyalara hem da başlankı klasların okullarına, neredä üürener pek az uşak. Bu reforma lääzım geçsin, kaavileştirmää deyni üürenmäk proţesin kalitesini, nışannayıp üürenicilerin yufka çıkışlarını küçük okullarda.
Moldova devletin Parlamentin deputatı Adrian Bȇluţel nışannadı, ani nasaat edilmiş reformalar doorudulu diil üürenmäk sistemasının resurslarını arttırmaa deyni, onnarın var bir önemli neet — kaavileştirmää ürenmenin kalitesini hem da kurmaa birtürlü koşulları hepsi üürenicilär için, bakmadaan, angı regionda yaşȇȇrlar.
«Açan biz sözleriz reforma için üürenmäk kurumnarında , biz sölämeriz nesoy sa resursların artırmaları için, biz söleriz kaliteli üürenmäk için uşaklara deyni, da bunun için hepsi okullar, angılarında reorganizaţiya proţesi olacek — bu heptän küçük okullar»,- Adrian Bȇluţel nışannadı.
Moldova devletin üüretim ministrusu Dan Perçun çizgiledi, ani millet ȇkzamennerin hem testlerin çıkışların analizi gösterer okulların üürenicilerindä pek yufka çıkışları, angıları düşerlär reorganizaţiya kriteriyalarına. Onun laflarına görä, struktura diişilmelersiz kaavileştirmää statistikayı hem da vermää uşaklara lääzımnü bilgileri — yok nasıl.
«Karar hem da bu reformaların bakılmaları söleer onun için, ani ȇkzamennerin hem testlerin çıkışları bu okulların üürenicilerindä — pek kötü. Taa sık, bölä üürenmäk okullarında bir üüredici götürer 5 disţiplina, da elbetki ürenmenin uuru düşer»,- Dan Perçun çizgiledi.
Ministruların öndercisi hep ölä çizgiledi, ani hepsi üürenicilär, angıları lääzım olaceklar diiştirsinnär üürenmäk okulunu, kabledeceklär lääzımnı tutturmayı. Uşaklar için verileceklär eni avtobuslar, herbir uşak için bakılı her ay paralar sayıda bin ley — iki yıladan.
«Uşaklar geçeceklär okullara, neredä var klaslar ayırı himiya için, biologiya için, fizika için, neredä var üüredicilär herbir predmetä. Onnar kabledeceklär binär ley iki yılın süresindä başka okula geçmeleri için. Biz vereriz eni avtobus korkunçsuzluk için hem da onnarın komfortları için. Orta yol eni okuladan kurȇr 10 km, bu 20 minutluk yol»,- Dan Perçun çizgiledi.
Devlet geçirmeyecek reorganizaţiya proţesini, erli alternativ okulu bulunarsaydı 20 km. taa uzak, nışanandı MD üüretim Ministrusu Dan Perçun. Gagauziyada reorganizaţiya proţesinä düşeer iki üürenmäk okulu — Ferapontyevka küüyün Marko Vovçok adına gimnaziya — uşak başçası hem da Budjak küüyün gimnaziyası.