Üürenmäk yılın ilk günü Gagauziyanın ürenmäk kurumnarında  başlanıldı ilk çamcaazın ötmesindän hem yortulu adamaklardan. Geçti butakım yortulu olay KDU-dä. Yakın 600 student bu gün geldi universitetä ilk sefer. Burada bulundu GRT kurumun çekim grupası

Sentäbr  birisi KDU studentlerinä deyni yortulu geçti. Kimisä burayı seftä geldi, başkası butakım olayda diil ilk sıra bulunardı, ama hepsinä deyni sentäbr  ayın biri- yaşamanın eni bir parçası. Kutlamaa studentleri eni yılın çeketmesinnän toplandı diil sade üüsek kurumun administraţiyası hem üüredicileri, ama Moldovada akreditaţiya kabledilän dipmissiyaların  hem yabancı universitetlerin temsilcileri. İlk üürenicileri kutladı KDU rektoru Sergey Zahariya: «Burada kendi adetleri, eni tehnologiyalar üüsek uurda uzmannarı hazırlamak proţesindä. Hem sizä hem bizä hepsimizä ii gitti, ki maasuz Komratta universitetimiz var, angısı devlet uurunda bir cümnä kurumu. Burada 35 yılın süresindä 10 bindän zeedä uzman hazırlandı. Büünkü gün bizim başarannar sorumnu». 

 Yortulu adamaklarlan studentlerä danıştı Türkiye devletin Genel konsulu Komratta Adnan Hayal: «KDU özel eri kaplȇȇr diil sade Moldovada, ama başka devletlerdä dä, biz devletimizä dä. Bu üüretim kurumu zengin tarihinnän, bilim uurunda çok genç olannarın geleceeni kurȇr hem terbieder onnarı, nicä paalı insanı bizim cümneyä».

Adamaklarlan olayın payalannarına danıştı Bulgariya devletin Büükelçisi Kişinövda Maya Dobreva: «Üürenin- bilgilär kuvet, ama bilmeklär o fenalık. Pek sevinerim şindiki gençlerä da adȇrım sizä eni üürenmäk yılında hem ilerki yaşamanızda sade ii gitsin».

Studentlär şükür ettilär üüredicileri hem musafirleri sıcak laflar için, ilk kursların studentlerinä sä sade ii üürenmeyi adadılar. 

«Bu önemli bir adım sizin profesional yaşamanızda. Ko bu yol bilimnän dolu olsun, ii başarlar sizä, ko haklar hem kanon sizin tarafınızda olsun. Umutlanȇrım, ani herbiriniz tutturmak bulacek kendi neetlerini giriştireräk»,- dedi student.

Başarlandı yortulu olay KDU gimnın  çalmasınnan hem çamcaazın ötmesinnän, angısı teklif etti studentleri ilk paralara.