Kıpçak küüyündä nışannadılar Yaşlı insannarın gününü. Adetä görä «Pobeda» kolhozu her yıl toplêêr o insannarı, kim çok yıl çalıştı kolhozda, verdi kendi saalını hem kuvedini ki Kıpçak küüyü ilerlesin.

Bu yıl saygı güttülär o insannara, kim 1955-ci yılda duudu — tamannêrlar 70 yaşlarını. Onnar için donattılar gözäl masa, çaldı muzika hem sölenildilär sıcak laflar. Insannar, kimin elleri bodayı çok yıl büttülår, ekmek yaptılar, kırda çalıştılar karannaa kadar, akıllarına getirerlär o yılları hem pek sevinerlär, ani onnarı saerlar hem unutmêêrlar.

«Pek saa olsunnar, ani tutȇrlar kolhozu, ani bizi ihtiarları kim işlemiş 40-50 yıl onnarı saerlar da bizi çaardılar bu gözäl olaya».

«Baada işledik, şükür Allaha saalım vardı, kaçardım , bitti o vakıtlar, büüküm, ihtialȇrız».

«Çok yıllar işledim kilimnerdä, kilim kırdım, çok düzennär dokudum, vinzavodta işledim, kırda işledim. bäö çok sevindim 70 yaşına etiştim».

Gagauziya Aksakallar nasaatın başı Vasiliy Arnaut kutladı hepsini hem urguladı, ani bu insannar pek çok çalıştılar ki Kıpçak ilerlesin deyni.

Vasiliy Arnaut Gagauziya Aksakallar nasaatın başı: «Her yıl biz burayı geleriz, 14-cü yıldan, bileriz insanı, göreriz, ani insan kolhozda kırda çok iş yapȇr, onnarsız olmayacek ne var büün masa üstündä».

«Pobeda» kolhozun başı Nikolay Dragan çizgiledi, ani bu kişilerin çalışkannı getirdi bölä uurlara kolhozu.

Nikolay Dragan «Pobeda» kolhozun başı : «İnsannar, ani işlemişlär burada 40-50 yıl, var 55, baarlim yılda bir keret bir masa koymaa — her yık toplȇȇrız, kim olȇr 70 yaşında, toplȇrız üzär kişi, açan toplanmȇr 100, çaarȇrız taa büükleri, sanȇrım. ani saymaa lääzım».
Kıpçak küüyün klisä izmetçisi Vitaliy Zelinskiy kendi kutlamak sözündä söledi,ani bu yortu pek önemni, neçin ki o anaların -bobaların günü, kim verdi yaşamak herkezä..

Vitaliy Zelinskiy Kıpçak küüyün klisä izmetçisi: «Bu gün taa analar-bobalar günü, ne berer kolaylık gençlerä, hepsinä, kim yok evdää da, annamaa, ani lääzım şükür edelim onnarı, kim yaşamak bizä verdi. Onnar o kişilär, kim kendi çalışkannıınnan küüyü kaldırdılar ayaa».

Yortu Kıpçakta taa bir keret verdi kolaylık toplamaa insannarı, baaşlamaa sevinmelik hem akılımızda tutmaa nekadar önemni saymaa yaşlı insannarı.