Çadır kasabasının profesional uçilişesindä geçti satmak sergisi, angısını teklif etti genç resimci uçilişenin başaranı Nikita Lozov.
Nikita Lozov artık 10 yıldan zeedä incä zanaatta. Onun resimneri — ayırı bir stildä, kendi bakışında hem istemeklerindä. Nikita ilk keret kendi resimnerini sergiya çıkardı. Onun becermekleri hem ayırı bakışı için söledi Nikitanın resim okulu üüredicisi Lidiya Popän: «O pek islää bir çocuk, derin duygulu. Kendi düşünmeklerini açıklayardı hem kiyatta, hem resimdä. Biz, açan geleriz sergilerä, resimnerdän var nicä annayalım kişiyi, bilmeyeräk resimciyi. Nikitanın çalışmalarına görä var nicä söleуlim, ani onun içindä dalgalanmaklar var, büün o bölä,sabaa var nicä başka türlü olsun».
Resimci Födor Duloglo kendi sözündä söledi,ani herbiri lääzım kendi düş gütmeklerini aslıya çıkarsın.
«Bu uur taa üüsek, nekadar resim okulunda, biz göreriz, ani Nikita okuldan sora çalışmış, ilerlemiş çok. Onda ilk sergi. Biz nışannadık, ani biraz karagöz resimnär renkä görä, ama kompoziţiya nicä lääzım olsun. Eer o ilerledärsaydi kendi çalışmaklarını üüsek uura resimnemektä çıkacek»,- Födor Duloglo söledi.
Tatyana Papurova uçilişenin yaradıcılık uurunda uzmanı nışannadı, ani bölä olaylar vererlär kolaylık gençlerä gitmää ileri.
«Biz savaşêrız yardımcı olmaa bizim başarannarımıza, bu pek önemni, neçinki büünkü yaşamak gösterer,ani diil sade bir profesiyaylan yaşêrlar, zerä taa nekadar çok üürenicidä var becermäk, taa okadar o üüsek başarlara etişer»,- Tatyana Papurova nışannadı.
Nikita Lozov için bu olay pek önemni — o ill keret açıkladı cümneyä kendi resimnerini hem işitti onnarın düşunmeklerini.
«Pek şaşkın duygular beni sarêrlar, dalgalanmak, düşünmedim, ani bölä uurda olacek. 4 yıl üürendim resim okulunda, orada çok işleri annadardılar, nesoy lääzım yapmaa, ama pek beenmüzdim, bana serbestlik lääzımnıydı. İsteerim şükür etmää üüredicimi Lidiya Petrovnayı, ani o bana serbestlii verdi hem herzaman yardım etti»,- Nikita Lozov nışannadı.
Sergidä hepsinin oldu kolaylıı satın almaa beendii resinmeri.