Çadır kasabasında profesional okulunda Açık kapular günü geçti. Burada toplandılar 9-cu klaslarĩn başarannarı Çadır okullarından hem Valä-Perjıdan. Uşakları tanıştırdılar zanaatlarlan hem kolaylıklarlan, angılarını profesional uçilişesi verer.
Açık kapular günündä üürenicilär üüretim laboratoriyalarında bulundular, lafettilär üüredicilärlän hem pay aldılar kimi praktik zanaatlarında. Ayırı onnarı meraklandırdılar master-klaslar, neredä herbir vardı nicä kendisini denesin hem zanaatı taa islää annasın.
«Hepsini beenerim, bän artık jararladım, ani burayı gelecäm üürenmää».
«Bu profesional okul pek islää, hepsini beenerim. Bän da gelecäm üürenmää — aaşçı-konditer».
«Prezentaţiya, hepsini sevdin, datlı imeklär. Bän burada isteerim üürenmää, traktorculuk uurunu ayıracam — Çiftçilik tehnikasınnan baalı. Üüreneciz, sora da işleyecez».
«Bän da pek beendim , te bölä gözäl çiçecik yaptım, bek meraklı».
Bölä olaylar , açan uşaklara zanaatları göstererlär annadêrlar, vererlär kolaylık üürenicilerä taa kolay kararı kabletmää kendileri için hem yapmaa adım kendi geleceenä, -nışannadı profesional okulun başı Vera Balova. O haberledi, ani bu yıl üüretim kurumu 500 bin leya grantı taradı. Bu paralara şindi alınêrlar eni zamandaş avadannıklar, ne verecek kolaylık taa islää uura kaldırmaa üürenicilerin praktika zanaatlarını.
«Bizä geldiynän, onnar var nicä alsınnar zanaat,angısını sora kullanaceklar kazanaceklar para, yaşayaceklar. Bizim diplomnar, ani biz vereriz, onnar bütün dünnedä geçerlär. Bizim çocuklar coyu bulȇrlar iş kendi ȇkonomika agentlerdä, angıları şindi bizimnän barabar üürederlär onnarı. Bän her keret söleerim, ani insan, angısı çalışȇȇr ilerlesin Gagauziya, Moldova onnar her keret olacek işçileri da, çocuklar buradan gitmeyeceklär . Bobalarına-analatına isteerim sölemää, ani gelsinnär, görsünnär kendileri sora çocuklarlan lafetsinnär — ilktän gelerlär çok küülerdän, kasabalardan, iki üç ayadan üürenerlär biri-birini, da istämerlär gitmää evä da kimi sıra»,- profesional okulun başı Vera Balova nışannadı.
Profesional okulda kendi becermeklerinnän paylaşêr halklararası êkspert Irina Kuzneţ. O yardım eder eni hem zamandaş metodları giriştirmää.
«Ne beni burada çok meraklandırêr hem ihlam verer kendi bilgilerimnän paylaşmaa — o uusek uurda kurulan çalışmak okulda, administraţiya, üüredicilär, hepsi biler ne lääzım yapmaa. Üüretim uurunda da biz kızlarlan artık çok geçtik, çok master-klas etiştirdik vermää — nesoy dikmäk maşinasında işlemää, angı kolaylıklar var onda»,- paylaşêr halklararası êkspert Irina Kuzneţ.
Büünkü gündä Çadırdakı profesional uçilişesi teklif eder başarannara 14 zanaat, dual üürenmeyi giriştirer, verer studentlerä stipendiya, yaşamak erlerini, kurêr üüsek koşulları bigilerin hem zanaatların kaliteli kabledilmesindä.