İyül ayın 22-dä, Pötr İvanoviç Moyse 73 yaşını tamannayaceydı.Pötr Moysä-poȇt, angısının şiirleri türkü oldular, onun sesi büünnän- büün gagauz radiosunun dalgalarında hem gagauz televizionun ȇkrannarında öter. Onun yaradıcılıı – bu diil sade poȇziya, bu bizim istoriyamızın, bizim kulturamızın, bizim canımızın bir payı. Pötr Moysenin adını islää biler herkezi, kim gagauz poȇziyasını sever. Onun adı Gagauziyanın anılmış şayirlerin arasında dayma yer alacek, diveç kalacek.
Pötr Moyse, gagauz halkının en duygulu lirik şayirlerindän biri, ölä o sayılardı hem ölä da kalacek. Onun şiirleri – can melodiyası gibi. Onnarı okuyȇrlar hem türkü olarak çalȇrlar. Herkezi, kim bilärdı Pötr İvanoviçi ona saygı hem sevgi duyardı — onun lafı için, yaradıcılıı için, insannşı için.
«Pötr İvanoviç Moyse en büük lirik gagauz literaturasında-geniy. Onun izi diveç kalecek kulturamızda. Benim da üreemdä. Onun vardı özel danışması bana –gaguzça –Länka bana deyärdi. O diildi dik. O gurur duyardı kendi gaguzluu için. Verädi bizä destek brakılmayalım , da ötä dooru yaradalım»,- nışannadı üüredici Elena Mokanu.
Pötr Moyse bütün ürektän paylaşardı kendi becermeklerinän hem ustacılıınnan –okuycularlan, seslicilärlän, genç yazıcılarlan. Bibliotekalarda onun kiyatlarını büük sevgiliklän koruyȇrlar, onun yaratmaları insannarın cannarında yaşȇrlar
«Onun bu gözäl lafları toplu peet kiyadında. Onun sözleri derin hem inca. Nekadar da okumasan, nesä eni bişeylär bulȇrsın eminin,ani her bir okuyucu kendi ürenä görä yaratmaları bulȇr olmayım»,- nışannadı Vasilisa Tanasoglo, Mustafa Kemal Atatürk adına bi̇bli̇otekanın başı.
Biliner, ani Petri Moysenin peetleri pek derin filosofiyalı, pek açik cannan yazılı. Onuştan da onnar artık türkü oldular. Pötr İvanoviç herzaman gençlerä hem laflan hem işlän yardım edärdi. Angısı yalpak dillän önemni işlär için annadardı.Onun lafları diveç kalaceklar bizim aklımızda, nicä bir örnek, nicä bir orientir- söleer anılmış gagauz tükücüsü Vitaliy Manjul: «Bän ona her keret deyärdim ,ani bän diilim şayir. Pötr İvanoviç deyärdi-her bir lafı ,angısını sän yazacan, da insan onu işidecek bil, ani ömüründä bu laf kuvedini tutacek. O insanın içinä girecek. Bak nica kendini duyacan Allahın önündä. Bän ürenerim ondan şindiyädän. O sansın gitmemiş bireri».
Pötr Moyse başkalarına ilham hem ürek verärdi ,hem sözün kuvedinä inanardı. Onun adı diveç Gagauz halkın literatura istoriyasında yazılı kalacek. Onun sıraları türkülerdä, Gagauziya Radio Televizionun ȇfirindä hem o insannarın cannarında, angıları hatır güderlär kendi halkının poȇziyasına öterlär hem öteciklär.