Moldovada aprelin 1-dän plana koyulu  zeedeletmää pensiyaları hem posobiyaları. İndeksaţiya  kuracek 6, 84 proţent da kaplayacek devlet pensiyanın kabledennerini, hem bir sıra  soţial  yardımını.  İndeksaţшya geçiriler  her yıl da baalı  infläţiyaylan, angısı belli edшler  geçän yılın  sonunda.  Bundan kaarä   bakılı onun zedelenmesi kanona görä  devlet pensiya sistemasına görä.  O  kuracek 51  ley. 

Proekti soţial  posobiyaların indeksaţıyası için hazırladı iş hem soţial ministerlii. Ona görä  bakılȇr,  ani 2026 yılın  aprelin  1- dän  soţial ödemekleri zeedeleneceklär 6,84 proţendä.  Bu  uura deyni  Moldovanın büdjetindän  doorudulu 2 milliard ley. Gagauziyanın  yaşayannarı  açıkladılar kendi bakışlarını  pensiyanın zedelenmesi için. 

«Bän çoktan  kablederim pensiyayı , işittim,  ani aprelin 1-dän  indeksaţiya olacek, ama o küçük.  Makar 10-15 proţendä  kaldırsınnar.  6 proţent bu pek az. Bän bilmeerim, nicä yaşȇȇrlar insannar. Bendä yakın 10 bin da bana etişmeer, ama nicä yaşȇȇrlar insannar  2- 3 binä, bilmeerim».

«Bu pensiyalarlan  yok nicä yaşamaa, ilaçları lääzım almaa,  her afta  sıra geler satın almaa ilaç.  İsteerim kaldırsınnar taa üüsek».

«Pek az, bän aldım borç  da ödedim gazı, alamȇȇrım  yaanı da satın». 

«Yardım etmeyecek , bän kablederim 3 bin pensiya  da bu proţentlär bana yardım edeceklär mi? Bän  bolniţada bulundum, koydular apparat  kalbimä da hererdä lääzım ödemää, yolu ödemää genä dä, ne bana bu 7 proţent?»

«Nicä yardım edecek? Bän şindi ödedim  koşulları, gaz 5000 bin, ama bän kablederim 3 bin pensiya. Ki ta ii yapmaa durumu, lääzım bu takım olsun, ki pensiya 10 bin ley kursun da lääzım olamayaceklar kompensaţiyalar. Da hepsi ii olacek».

«Dooru insan söledi, er pensiya olaydı 10 bin , problema da olmayaceydı. Koşullar alȇrlar hepsini,  ver Allahım olsun pensionerlara taa ilin».

«6,8 proţent — bu nekadar? Taa ii yapaydılar  10-15 proţent. Bän olaydım 50 yaşımda , bän gideceydim  kazanca, ama şindi orada kabletmeerlär, burada da yok nicä işleyelim».

«Etişmeer. Nicä yaşamaa? 6,8 proţent — bu ne?  Pek zor hepsinä arttırmaa,  ödemää koşulları , ilaçları almaa lääzım,  hepsicii paalı».

«Pek zor. Pensiyayı harcadık  gaza hem şafka,  sade   fasülä iyeriz hem kartofi, pek zor».

Kuvetlär  urgulȇȇrlar, pensiyaların hem soţial  posobiyaların  zeedelenmesi — lääzımnı ölçü  tutturmaa deyni insannarı,  açan paalar üüseler.  MD Premyer- ministrusu Aleksandru Muntänu  urguladı, ani pensiyaların  indeksaţiyası  yapılı bakarak infläţiyaya hem devletin  büdjetın kolaylıklarına görä.  

«Biz savaşȇrız yardım etmää  en yufka insannara  hem ilerlederiz bunu yapmaa.  Bu yakınnarda biz indeksaţiya yapaceez  pensiyalara — yapȇrız hepsini , ne yakışȇr.  Ofiţial haberleri açıklayacez sürmäk ayında,  indeksaţiya geçecek  çiçek ayında.  Laf gider 6 proţent için. Bu pozitiv adım, bakarak ona, ani infläţiya  iisiler  da kurȇr 4 proţent, bu söler onun için, ani insannarın gelirleri büüyerlär»,- Aleksandru Muntänu  urguladı.

Ofiţial habelerä görä  2026 yılın çeketmesinä  Moldovada orta pensiya kurȇr  4 bin 277 ley , 530 bin insan da kableder  pensiyayı  yaşa görä. Aprelin birindän  minimal pensiya Moldovada kuracek  3 bin 264 ley, insannara da, kimin iş stajı üüsek, kuracek -3525 ley. Kolaylıksız insannara  ödemeklär  da zeedeleneceklär —   1632 leydän -2448 leya kadar.