Gaydar küüyundä illerleerlär işlär Lunguţa deresinin paklamasında hem derinnetmesindä. Erindeki kuvetlär urgulȇȇrlar, ani proektin geliştirilmesi yardım edecek yaşayannarın koruntuluunu hem gidrotehnika sistemasının işini çok yıllara sürtmäk için yapmaa.
Proektä görä, Gaydar küüyün deresindä komplekslı derinnetmäk hem paklamak işleri lääzım olsunnar.Bütündän paklanılacek 15 km: 9 km – Gaydar küüyün dışaanda, taa 6 –küüyün içindä.Düzmäk işlerin öndercisi İvan Arabadjı urguları,ani önemli işlär küüyün dışaanda şansora yapıldılar.
«Derenin payı,ani küüyün dışaanda geçer şansora paklanıldı.Şindi giderlär işlär küüyün ortasında derenin sol kenar payında.Var kendi zorlukları- köprülär altında ellän işleerlär. Mıldan paklanılȇrlar.Herbir gidrotehnika obiekti lääzım çalışsın 40-50 yıl»,- İvan Arabadjı urguları.
Gaydar küüyün başı İlya Kiosä nışannadı,ani proekt geliştiriler Ekologiya Fondun parasınnan hem Gagauziyanın bücetından kontribuţiyaylan.Proektin paası -6 mln ley.
«Para sayısı diil küçük,ama proekt ii.Tutmȇȇrım aklımda nezaman bitki sıra Lunguţa deresi bütündän paklandı hem derinnendi. Yakın 10 yıl geeri biz 3 köprü pakladık,ama bu diildi eterli –onnar tez mıllandılar.Olsun deyni iilik, lääzım birdän paklamaa bütün dereyi.Şindi su taa ii gider, derenin dibi genişlener.Umutlanȇrız,ani yıllara olacek proekt, insan gübür çıkarmayacek»,- İlya Kiosä nışannadı.
Derenin boyunda yaşayan insannarın çorbacılıkların buultması aktual kalȇr diil bir yıl.İnsannarın maazaları herzaman suylan dolȇrlar.İki yıl geeri su buulttuydu birkaç ev.Primar urguladı,ani ayırı erlerdä derä dibi iisildiydi bir yada yarım metraya kadar, nedän su gitmärdi.Bu üzerä da kararlandıydı paklamaa hem derinnetmää onu bütün uzunnuunda, olmasın deyni bölä durumnar gelecektä.
«İkyazın su eritmeklerin vakıdında derenin paklaması tabiata fayda getirer, koruyer insannarın evlerini, yolları bozulmaktan.Geçer derä bütün küü içindän, orta yolun boyundan da.Köprülär kolverämärsälär suyu, bu getirer yol hem başka infrastrukturanın bozulmasına»,- İvan Arabadjı urguları.
Proekt çekettirildi 3 yıl geeri.Plana görä geliştirlener, da uzmannarın laflarına görä, kurulmuş sıraya görä hepsi yapılȇr.Plana koyulu işleri başarmaa may ayın bitkisinä kadar.