Çadırda geçti Oyuncak kukla teatrusunun proektin başarılması. Teatrunun baş neetiydi — korumaa hem ilerletmää gagauz dilini, kultura zenginniini korumaa.
Bir buçuk yılın içindä koyuldu 4 spektakl gagauz dilindä usaklar için. Pyesaların avtoru oldu akademik Todur Zanet, muzikayı da yazdı Födor Gaydarji, söledi «Mirkiras» proektin öndercisi İrina Mihalçuk: «Bu vakıdın içindä koyuldu 4 spektakl, oldu 65 göstermäk Gagauziyanın hepsi yaşamak erlerindä. Biz savaştık gitmää diil sade yaslalara, ama okullara da, maasuz merkezlerä da, yaratmak evlerinä da, lagerlerä dä. 4 spektakl bütündän gagauz dilindä, onnar tradiţiyaları açıklêrlar hem kulturamızı koruyêrlar».
Oyuncak teatrusu gitti Gagauziyanın may hepsi kasabalara hem küülerä. Proektin kapanmasında gösterdilär «Fet frumos hem Padişahın kızı» spektaklisini. Siiredicilerin birisi, angısı ilk keret gördü spektakliyi, açıkladı kendi duygularını.
«Bölä proektlär vereceklär büük zenginnik bizim halkımıza, çoyu uşaklar lafetmeerlär gagauz dilindä, çoyu büüklär da annamȇȇrlar. Bölä meraklı oyuncaklar göstereceklär, ani var nicä bakmaa dilä herbir taraftan, diil sade üürenmää onun kurallarını yada cümlelerini».
Akademik Todur Zanet — hepsi pyesaların avtoru çizgiledi, ani teatru oldu pek islää bir kolaylık uşaklara göstermää, nekadar şıralı hem zengin gagauz dili.
«Bän sayȇrım, ani pek islää, ani Çadır baktı uşaklara, biz onnarı unudȇrız, bizdä var teatr, büük pyesaları koyȇrız, her keret uşaklar gelmeer orayı. Bunnar küçük yaptılar, küçük sţenelar, küçük kuklalar gözäl, açan giderlar uşak başçalarınaţ Siz görün, nicä uşaklar çıvdırȇrlar da oynȇȇrlar bilä, iki spektakl interaktiv, uşaklar lafederlär, aktörlar onnara yardım ederlär»,- akademik Todur Zanet açıkladı.
Oyuncak kukla teatrusunun kurulması aslıya çıksın yardım etti Mirkiras birlii barabar Çadır kasabasının primariyasınnan.