2026-cı yılın yanvar ayın 27-ndä GHT başın işini götürän Nikolay Ormanji brifingi geçirdi. Burada laf gitti avtonomiya kuvetlerin çalışması için diplomat missiyalarınnan.
Nikolay Ormanji haberledi olaylar için, angıları geçtilär 2026-cı yılın Yanvar ayın 23-ndä. Onun laflarına görä, o gündä Gagauziya Halk Topluşunda geçti buluşmak Rusiya devletin büük elçiliin azalarınnan. O oldu protokola görä. Buluşmakta laf gitti barabar çalışmaklar için. Hep o gündä delegaţiya Komrat kasabasinda liţeyin birisindä bulundu hem üülen ekmää vardı programada, dedi Nikolay Ormanji: «Açan çıkardık, belli oldu telefon açması için — haberlendi,ani restoran yapısında mina yada nesaydı başka varmış. Poliţiya uzmannarı geldi, yangın süündürücülär hem kurtarıcılar. Biz çıktık da gittik».
Hep o gün Komrat kasabasında buluşmak geçti Evropa Birliin Büük elçisinnän da. Bu buluşmaya Ormanji teklifi kabletmedi.
«Bizim kolegalar söledilär, ani lääzım verilsin er, neredä buluşmak geçirilsin. Beni orayı teklif etmedilär. Geçti o saat dörttä gündüz»,- Nikolay Ormanji dedi.
Ayırı dikkatlık brifingta laf gitti diplomat missiyalarlan birtürlü ilişkilär için. Bundan kaarä sölenildi, ani lääzım olsun konstruktiv dialog bu kurulan politika- hak durumunda.
«Iki afta geeri bän buluştum Türkiye büük elçisinnän. Bän hazırım buluşmaa Moldovanın ofiţial kişilerinnän, prezidentlän dä, Parlament başınnan da. Biz lääzım bulalım çıkışı Gagauziyada kurulan durumdan. Biz politika krizisindä bulunêrız da lääzım çıkalım ondan, kullanıp hepsi kanon kolaylıklarını»,- Nikolay Ormanji dedi.
Nikolay Ormanji hep ölä da brifingta söledi Merkez seçim komisiyasının kurulması icin, angısına Moldova Respublikanın seçim Kodeksindä Merkez seçim nasaatı deniler. Bundan kaarä seçim vakıdına hazırlamaklar için Nikolay Ormanji söledi, ani hepsi olaylar, ani geçirilerlär, yapılêrlar kuvettä bulunan kanonnara görä.
«Hepsi kurulan zor soruşları biz kararlayacez oturup hem lafedip. Aarayacez dooru hem uygun variantları, ki Gagauziya Halk Topluşuna seçimneri geçirmää»,- Nikolay Ormanji söledi.
Brifingın sonunda Nikolay Ormanji umut etti, ani hepsi provokaţiyalar biteceklär hem çizgiledi, ani lääzım maasuz dialogu ilerletmää, ki avtonomiyada cümnä hem politika durumu uslansın.