«Olimpieţ» lagerindä üçüncü smena bitti. Uşaklar için hazırlandılar hem geçirildilär  sport yarışmaları, yaradıcılık konkursları, ekskursiyalar hem tanışmaklar.

 On günün süresindä, angılarını lagerdä geçirdilär uşaklar vardı hepsi- sabaalenki lineykalar, şen gimnastika, sport  bataliyalar hem oyunnar geç vakıdadan, gezintilär, türkülär ateş yanında hem eni dostlar, angılarınnan zor ayırılmaa söleerlär uşakalr. Onnarda kaldılar sıcak aklında tutmaklar dinnenmektän da onnar genä isteerlär lagerä gelmää.

«Bän beendim. İslää doyurardılar, baseyn pek islää. Büük teritoriya, neredä var nasıl ilsää dinnemää hem şkolaya karşı vakıdı geçirmää».

«Hepsini beendim. Büük teritoriya. Biz geziya gittik, orada hepsini beendim. İmek odasında imeklär pek datlıydılar. Baseynada yıkanmaa isläydi. Evceezlär, neredä yaşardık hep beendim».

«Burada pek islää hem şen. Eni dostlar peydalandılar».

«Bän burasını beendim. Smena pek isläydi. Eni dostlar peydalandılar. Bu smenayı en pek beendim, nekadar burada bulundum».

«Bän «Olimpieţ» lagerindä üçüncü smenayi beendim, neçinki bu smenada benim dostlarım geldilär da biz pek şen vakıdı geçirdik. İsteerim burada kalmaa çok vakıda, neçinki taa yakın dostlarına bulunȇrsın hem da burada soluk başka».

«En unudulmaz momentlär o  lagerin mis hem misteri. Baseynayı beendim, bizim oträd en birleşik hem dostlu. Halizdän gitmää buradan istämeerim. On gün hızlı geçti.»

Üçüncü smenanın kapanması yortulu durumda geçti. Uşaklar türkü çaldılar hem oyun oynadılar. En ii oträdları hem aktiv pay alannarı kablettilär baaşışları hem anmak gramotaları. Lagerdä bulunarkana uşaklar diil sade dinnendilär, ama kaavilendilär, buldular eni dostları hem da faydalı becermekleri kazandılar, üürendilär komandada işlemää, -urguladı «Olimpieţ» lagerin başı Vladimir Kılçık: «Adȇȇrım sizdä hepsi islää olsun. Açan siz şkolalara, liţeylerä hem gimnaziyalara  gideceniz o kuvedi, ani burada kazandınız praktikada kullandınız. Sayȇrım, ani on günün içindä siz etiştirdiniz eni dost bulmaa. Da umut ederim, ani bu baalantı çok yıl olacek».

Dinnenmenin üüsek uurda hazırlanmak için  şükür etti lagerin administraţiyasını hem terbiedicileri Başkan hem Bakannık komiteti işleri bakannıın başı İvan Kolioglo. O nışannadı, ani üçüncü smena o herzaman bir özel vakıt, angısı yaz zamanın sonuna geler, açan uşaklar savaşȇrlar dinnenmektän hepsini almaa.

«Sizin smenanız bitti. Bitti hepsi lagerlerdä da dinnenmäk vakıdı. Kanikullar da sonuna yaklaşȇrlar. Umutlanȇrım, ani sizdä taa çok energiya hem duygular toplandı. Siz dostalştınız eni insannarlan kendi akrannarınnan»,- Bakannık komiteti işleri bakanı İvan Kolioglo nışannadı.

Lagerä gelmää isteyennerin sayısı çoktu, nışannadı «Olimpieţ» lagerin üçüncü smenanın kapanmasında gençlär hem sport   bakanı Väçeslav Dragoy: «Bän umutlanȇrım, ani sizin aklınızda kalaceklar o momentlär, angılarını siz lagerdä geçirdiniz. Bän şindiyädän aklımda tutȇrım türküleri, angıları Beşalmada lagerdä ötärdilär. Sayȇrım, ani burada naşeysä islää evä alacenız. İsteerim adama başarları  ileriya dooru hem okulda da».

 Üç smenanın süresindä «Olimpieţ» lagerindä 300 uşak dinnenäbildi. Ama bütündän Gagauziyada 4 dinnenmäk lageri işledi Kıpçakta, Kazayakta, Kirsovada hem Komratta, neredä dinnendi 1100 uşak.