Gagauz Eri Bakannık komiteti Üüretim uurunda fonduna diişmekleri geliştirdi. Butakım Respublika uurunda geçirilän olimpiadalarda tarayan üürenicilär hem onnarın üüredicileri taa üüsek premiyaları kabledeceklär. Bu karar kabledildi, ki üüredicileri, üürenicileri havezlendirmää hem tutturmaa onnarı.
Eniliklerä görä respublika uurunda geçirilän olimpiadalarda tarayan üürenicilär birinci er için 2000 bil ley kabledeceklär, 2-ci er için — 1600 ley, 3-cü er için 1200 ley, hem 4-cü er için — 800 ley. Şindiya kadar bu sayılar iki okadar küçüktülär. Zeedelendilär üüredicilär için dä premiyalar. O uzmannar, angılarının üürenicileri ödülleri alacȇklar 2000 bin ley kabledeceklär. Gagauz Eri Üüretim bakannıın başı N.Kristeva çızgiledi, ani region hem respublika uurlarında geçirilän olimpiadalara katılannarın sayısı yıl-yıldan zeedelener.
«2024-2025 üürenmäk yılında region uuru olimpiadalarında 1 065 üürenici pay aldı. Bu en büük sayı bitki yılların içindä. Bu üürenicilär 327 ödül erini aldılar»,- Nataliya Kristeva çizgiledi.
Özel eri respublika uurunda geçirilän olimpiadalar kaplȇȇrlar, çizgiledi N.Kristeva: «2024-2025 üürenmäk yılında respublika uuru olimpiadalarında bizim üürenicilerimiz 47 ödül erini aldılar. Bu büük başarı bizim için. Bundan kaarä çizgileyecäm, ani bizim var kendi özel olimpiadalarımız. Biz başlankı klaslar arasında da yarışmaları geçireriz. Katılȇrlar olimpiadalara 5, 6, 7, 8 klasların üürenicileri dä. Üst erdä gagauz dili olimpiadası elbetki».
Gagauz Eri üürenicilerinnän hodullanȇr, çizgiledi N.Kristeva. Bıldır üürenicilär halklararası uurunda da avtonomiyayı andırdılar. Azerbaycanda geçän Türk integraţiyası olimpiadasında bir altın bir dä gümüş medali, İT Scratch olimpiadasında da birinci er. 2024-2025 üürenmäk yılında region, respublika hem halklararası olimpiadalarının sonuçlarına görä hep ölä talantlı uşakları tutturmak programasına görä gagauz eri bücetindän premiyalar için 436 000 ley harcandı.