Kıpçak küüyün Boris Yanakoglu adına liţeyindä geçti yortu, angısı baalıydı okulun 65-ci yıl dönümünä.
Okul açmış kapularını 1960-cı yılda. 2009-cu yıldan beeri o taşıyêr Afgan cengindä kahramanın Boris Yanakoglunun adını. Büün burada üürener 300 uşak Bu yılların süresindä burada kuruldular çok türlü adetlär, kazanıldılar üüsek başarlar — hepsi bunnar üüredicilerin hatırı hem çalışkannıı, dedi liţeyin direktoru Natalya Uzun: «Hepsi başarlar, angıları var bizdä — olimpiadalarda devlettä, sınır aşırıda, hepsi onnar üüredicilerin başarları, neçinki hepsi onnar bütün canınnan çalışêrlar hem vererlär bilgileri üürenicilerä. Bizim yortu adalı okulun 65-ci yıldönümünä, liţeyin da -20-ci yıldönümünä».
«65 yılda oldu çok başarlar, okul çok türlü basamakları aykırladı»,- dedi liţeyin üürenmäk bölümü başı Svetlana Todorova.
«65 yılda oldu başarlar, üüsek uurdaydık, göreriz, mutluyuz, sevineriz, kutlêêrım kollegaları, üürenicileri. Isteerim dilemää saalık aylelerä,şkolamıza üüsek başarlar»,- ekledi Svetlana.
Liţeyin üüredicileri — profesionallar, angıları büük sevgiylän kendi bilgilerini vererlär uşaklara, tebiederlär hem üüsek başarlara götürerlär, dedi Gagauziya üüretim bakanı Natalia Kristeva: «Liţeyin istoriyasında var çok gözäl sayfalar, hem taa ileri dooru da olaceklar. Isteerim danışmaa bu okulun üüredicilerinä- siz bu liţeyin canı, kalibi — hem nekadar o kalib kaavi, ona görä da yaşayacek okul. Uşaklar — siz bu okukun maanası. Ko sizin işleriniz hem yaptıklarınız bir zaman da gücendirmesinnär üüredicileri hem anaları-bobaları».
Liţeyin kolektivini GHT başı Dmitriy Konstantinov kutladı.
«İsteerim sizi kutlamaa bu yortuylan, şükür etmää öndercileri, üüredicileri, Gerçektän, üüredicilär — onnar temel, hem nicä da bütün dünnedä, bileriz, ani üüretim sisteması en önemni herbir devlettä, kim bunu annamȇȇr — kaybeder geleceeni»,- nışannadı spiker.
Ekaterina Mandaji artık 62 yıl bu okulda çalışêr. O hazır herzaman yardım etmää hem göstermää dooru yolu.
«Okulda 62 yıl işleerim. Pek gurur duyêrım kendimi liţey için. Bu benim ayläm, benim evim. Biz çıkardık 4 bindän zeedä üürenici- onnarın arasında doktorlar, üüredicilär, agronomlar, bilim adamnarı, onnar hepsi bizim zenginniimiz»,- dedi Ekaterina.
Kutlamak laflarını söledi Gagauziya başkan işleri bakanı Ivan Kolioglo: «Bakannınnık komitetin adından kutlêêrım sizi, 65 yıl okula, 20 yıl liţeyä. Isteerim urgulamaa, ani Yanakoglu adını liţey üüsek erdä bulunêr kendi başarlarınnan. Bän nicä kendim Kıpçaktan gurur kendimi duyêrım, açan işiderim bizim liţeyi».
GHT deputatları hep ölä kutladılar kolektivi bu yortuylan, söleyip, ani okulun başarları — o insannarın hatırı, kim her gün burada çalışêr. Dmitriy Manastırlı artık 34 yıl liţeydä biologiyayı üüreder.
«Bän isteerim şükür demää Allaha, ani o beni fikirledi, ani bu zanaatta, angısını bän bu yaşamakta ayırdım, bän sevinerim ona,ani bän her sabaa kalkêrım da giderim işä, angısını bän beenerim».
Deputat Valeriy Manastırlı hep bu okulu başarmış.
«Bän pek islää bilerim, nekadar zor üüredicilerä, benim anam-bobam üürediciydilär. Ban tutêrım akılımda, nicä mamu tefterleri kontrol edärdi gecä, isteerim şükür etmää sizi hepsinizi».
Primariya adından liţeyin kolektivini kutladı primar yardımcısı Anatoliy Talmaç: «65 yıl gözäl bir yaş, 20 yıl liţeyä, taazä fikirlär, taazä hem meraklı gelecää var liţeyin, hepsinä saalık olsun, dünnedä dünnä olsun,saymak olsun hem çok çok uşak olsun bizim şkolalarda».
Yortunun süresindä üüredicilerä ayırı başarlar için, iş veterannarına , genç uzmannara gramotaları hem medalileri verdilär onnarın üüsek çalışmakları için.