Dialog studiyada programasında Gagauz Eri Üüretim bakannıın başı Nataliya Kristeva okullarada notalamak uurunda eni kurallar için annattı. Enilikleri Üüretim ministerlii kurdu hem kabletti. Dokumenttä yazılı, ani başlankı klaslarda kimi predmetlerdä sıradan notalar koyulacȇklar. Hep ölä belli edilidilär 5-ci klasların üürenicilerinä deyni adaptaţiya periodunun koşulları. Bu hem başka eniliklär için sıradakı süjetimizdä.
Başlankı klaslarda genä sıradan notaları koymaa başladılar. Bu yapılȇr o predmetlerdä, angıları ekzamen sesiyasında olacȇklar, çizgiledi Üüretim bakanı N.Kristeva: «Sıradan notalar artık kullanılȇrlar avtonomiyanın okullarında. Sadecä bir okul bu işä taa katılmadı. Ama gelän yıldan ötää bu enilik hererdä olacek. On ballık sisteması sadecä ekzamen sesiyasında olan predmetlerindä işleyecek. Kalan predmetlerdä kriterial notalamak sisteması kullanılȇr».
Üürenicinin notaları ii olmasalar da o hep okadar 5-ci klasa geçiriler, çizgiledi N.Kristeva. Bundan kaarä üürenicilerä adaptaţiya için zaman veriler. 5-ci klasın ilk payında onnara notalar koyulmȇȇrlar. Bundan kaarä eni kurallara görä 1 klasta 1 üürenmäk günün içindä iki kontrol işi yakışmȇȇr olsun. Okulların öndercilii bunu mutlak göz altında tutsun lääzım. Bu yapılȇr, ki üürenicilär taa raat üürensinnär hem kaliteli busoy denemeklerä hazırlansınnar. Üürenici evdeki işini yapmadıysa üüredici diil lääzım alatlasın ona kötü notayı koymaa. İl uurda üürenicinin interesleri olsunnar lääzım, çizgiledi N.Kristeva: «Üüredicilär en ilkin üürenicileri düşünsünnär lääzım. Ama üürenicilär dä diil lääzım unutsunnar, ani onnar cuvaplı da evdeki işlerini vakıdında yapsınnar».
Hep ölä notalamak kurallarında belli edildilär predmetlär, angıları üürenicilerin orta balını diiştirmeerlär. Bu resimcilik, muzika terbi etmesi, fizkultura, vatandaşlık terbi etmesi hem başka.