Gagauz ustacılıını keptar hem kalpak dikmesindä Nikolay Kubus Çeşmä küüyündän otuz yıldan zeedä korudȇr. Tradiţional kolsuzları usta koyun derisindän diker. Zanaat saklılıklarını yılların birisändä o Kongazdan ustada üürenmiş, büün Nikolay kendi halkın tradiţiyasını ilerleder.
Kubus Nikolay için deridän giim hem baş tertibini dikmäk iş sırası diil, o zanaat, angısına kendi yaşamanım büük payını baaşladı. Merak evelki halk ustacılıına onda çok yıl geeri peydalandı. Yavaş-yavaş meraklandıı zanaat Koli batüya deyni haliz ustacılaa döndü. İş koyun derisindän başlȇȇr. Malı lääzım hazırlamaa: yıkamaa, sepelemää, kazımaa da sade kocaman iş sırasından sora deri hazır olacek dikmeyä.
NİKOLAY KUBUS usta
«Te şindi deri hazır dikmeyä».
Hazır temizli deri malı ustanın iş erinä geler. Burada Nikolay ölçüyü alȇr hem diker. Keptarın taa büük işi ellän yapılȇr. Özel dikkatlıı usta tradiţional gergeflerinä verer, çünkü giimä onnarda millet koloriti hem gagauz halkın varlıı korunȇr.
NİKOLAY KUBUS usta
«Evelki keptarlarda te bu kalpta cöpleri dikärdilär».
El işi çok zaman alȇr, saburluu isteer hem büük ustacılıı. Keptarın herbir ȇlementi ustanın elindän geçer.
NİKOLAY KUBUS usta
«Bu keptarın bir payı, te bu da ikinci».
Nikolay koyun derisindän keptarları hem kalpakları diker. Giimnär yılın suuk zamanında taa çok kullanılȇrlar.
NİKOLAY KUBUS usta
«Pek isteerim halk zanaatını korumaa, çünkü gagauz köklerim».
Halk tehnologiyalarını kullanarak, natural mallarından dış giimini Nikolay Kubus otuz yıldan zeedä diker. Onun malları ruba sade diil – onnar halk kulturanın payı, angısını usta ellerinnän yaradȇr. Evelki gagauz zanaatını Koli batü sevdi hem ömür zanaatına çevirdi. Büün usta Çeşmä küüyündä çalışȇr, dedelerin tradiţiyalarını gagauz halkın istoriyasını hem evcimannıını kendi işlerindä korudarak.