Kış zamanın ilk günnerindän yaşayannar başlȇȇrlar Eni yıl yortularına hazırlanmaa- ayırmaa hem satın almaa baaşışları yakındakı insanlarına, donaklȇȇrlar evlerini hem odalarını, ayırȇrlar yortunun en önemni simbolunu- çamcaazı. Ama kalkȇr başka zorluk- neyı ayırmaa — plastik ya natural çamcaazı.
Satın alsınar plasmastan çamcazı, angısını çok yıl sıradan kullanabileceklär, yada adetçä diri, eşil, özel kokuylan çamcazı ayırsınar. Yaşayannar paylaştılar, bakarak neyä onnar çamcaazı ayırȇrlar.
«Elbetki, donaklȇȇrız. Diri taa pek severiz, ama şindi onnarı zor bulmaa, ki yakışıklı da gözäl dä olsun. Ama Eni yılın kaarşısında aaramaa da istämeeriz. Onuştan plastmastan çamcaazı donaklȇȇrız».
«Plastmastan çamcaazı ayırȇrız, neçinki hızlı donaklanȇr. Ama adetlerä görä elbetki diri çamcaaz lääzım olsun — bu adetçä Eni yıl yortuların simbolu».
«Diri taa ii, ama pek paalı oldular. O üzerä plastmastan satın alȇrız».
Kararı, neçin taa sık plastmastan çamcaaz ayırȇr, insan açıklȇȇr, ani tabiatı lääzım korumaa hem, ani onunnan çok yıl sıradan olabilecek kullanmaa. Başka yaşayannar kendilerinä deyni diri fidan Eni yıl için ayırȇrlar, neçinki bu şindän adet gibi oldu. Bu yıl Moldsilva kurumu pitomniklerindän satmak için yakın 40 bin çamcaaz hazırladı. Komratta şindän sora var nasıl satın almaa bu fidannarı köklän bilä. Bu taa bir variant o kişilerä, kim taa düşüner, nesoy çamcaaz donaklamaa, da yortudan sora onu sıbıtmamaa, ama ekmää dışarda.
«İleri uşaklar küçüktülär, da önemliydi bararbar bobasınnan ayırsınar, satın alsınar, donaklasınar çamcaazı. Açan uşaklar büüdülär, kararladık plastmastan çamcaaz satın alalım, ki tabiyat da koounsun».
«Bizim borcumuz — gösterelim uşaklarımıza bu ii, gözäl adeti».
Bu yıl Gagauziyanın merkezini Eni yıl yortularında iki büük çamcaaz donaklayacek- birisi plastmastan Bakannık komitetin önündä, ikincisi diri- Komradın merkezindä. O da, bu da kendiycesinä gözäl, ikisi dä sevindireceklär yaşayannarı hem musaafirleri Eni yıl yortularında.